Aizawl October 5, 2024: Vawiin khan Lengpui Thlawhna Tumhmunah Chief Minister Lalduhoma chuan IndiGo thlawhna Delhi leh Aizawl inkara thlawk thin a leta tihpun (doubling of flights) thar hawnna a hmanpui a, thlawhna thlawk belh hmasa bera chuang tur passenger hnenah Boarding Pass a hlan a, Thlawhna a vai liam bawk.

Hawnna inkhawmah hian Chief Minister chuan, mamawhna hriatpuia hma laksaktu Ministry of Civil Aviation, Govt. of India leh IndiGo Airlines te chungah lawmthu a sawi a. Hei hian India ram laili leh Mizoram chu inpawh nasa lehzualin a siam dawn a. Officials chet velna atan te, sumdawngten hma thar an lakna atan te, phai lam pan ngai damlo tan te, leh zirlaite tan te a tangkai dawn a. Mizoram chu tlawhpawh awl lehzuala siamsak a, khualzin tan tlawh pawh a awlsam lehzual dawn a ni, a ti.

Mizoram sawrkarin civil aviation hmasawnna lamah hma a la chho zel dawn tih tarlangin, Lengpui Tumhmun a tul anga tuaihnum chhoh zel a nih tur thu te, Mizoram hmun thenkhata Heliports din a nih tur thu te a sawi bawk.

Chief Minister hian thlawhna thlawk belh hmasa ber tur lawmna cake a zai a, a chuang tur passenger thlan chhuah pakhat hnenah Boarding Pass a hlan a, Thlawhna thlawk chhuak tur hi a vai liam bawk.

IndiGo hian kar khata thlawhna vawi 5 an lo thlawhtir thin chu vawi 10 ah an tipung dawn a. Nitina thlawk a awm bakah Nilaini, Zirtawpni leh Pathianniah vawi hnih thlawk a awm dawn a ni. Hetianga IndiGo in a thlawh zat a leta an tihpun chhan hi kumtir lama Chief Minister in Ministry of Civil Aviation-a hma a lo lak tawhna rah a ni.

A hawnna inkhawmah hian Special Director, IndiGo PK Singh, IAS (Rtd) pawhin, he hmalakna hian India ram laili leh Mizote inkarah inunauna tha zawk, inpawhna nghet zawk a siam a beisei a. Mizoram sawrkar hmalaknaah a lawm tih a sawi a. Mizoramin thlai thar hralh tur a neih, Thlawhnaa phurh chhuah theih dan tur pawh an lo dap ang a. A hranin ruahmanna duan an lo tum thu a sawi bawk.

He hunah hian Lok Sabha MP Richard Vanlalhmangaiha ; H. Lalzirliana, MLA ; Chief Secretary Dr. Renu Sharma leh Commissioner & Secretary to Chief Minister Vanlaldina Fanai bakah Civil Aviation official pawimawh te, IndiGo Airlines thuneitute an tel a ni.