Covid 19 Vegetable Supply Chain chuan thlai thar hralh leh lei kawngah lockdown/curfew puan a nih avangin mipuite'n harsatna namenlo an tawh chu sutkian tumin Serchhip bul Zawlpuia thlai thar quintal 300 zet chu mipui chen tamna ber Aizawl khawpuiah phur luha fimkhur leh felfai taka hralh ni se tiin a rel thlu a, Zirtawp zan la la khan Aizawl luhpui an ni.

Aizawl District Magistrate chuan thuchhuah siamin dan tlawhchhana curfew a lo puan tawh chu Inrinni zing atanga tlai thleng a thlah dula, mipui te chakkhai lam khawm nana hun siam chu a tum ber a ni. Thupek-ah hian Aizawl DC chuan Aizawl Municipal Corporation huam chhungah thlai zuar te chu feet 6 dana inpho tur leh task force te'n vil turin ziah lan a ni nghe nghe a ni.

He order hi social media-ah darhin mi tam takin bazaar hulum laia mipui tam tak punkhawm chu an duh lo nghal a, doctor intelkhawm pawl pawhin tun dinhmunah chuan Covid 19 a darhzualna nia hriain a himloh thu thuchhuah an siam chuk chuk a, Local Task Force thenkhat pawhin thupek chu an thlawp lo tih thuchhuah an siam a. Aizawl bazaar lun ber awmna Veng Dawrpui pawhin thuchhuahin kaltlangpui a nih chuan Task Force atanga inhnuhdawh mai an tum thu an sawi a ni.

A hnu lawkah Aizawl DC chuan a thupek hmasa zawk chu sut lehin mipui tana thil tha zawk a nih vanga sut a nih thu thupek dang a siam leh bawk a ni. Aizawl DC in tlawma la loa mipui himna tur zawk nia thupek dang a siam leh mai hi a puitlin thlak khawp mai. Tun ang hunah chuan Sawrkar puipa tan chuan mipui ei tur nghei tir loh hi an tum tur a ni a, ngunthluk taka ngaihtuahin thupek hmasa zawk hi a siam niin a lang a. Chutih rualin mipui himna ngaih pawimawh hunlai tak a ni bawk a, mithiam (medical) te rawn an ni lo niin a lang a, hei erawh chu a fuh chiah loin a hriat a. Eng pawh nise hri darh zel thei kan veng tlang niin a hriat a, thil pawi a thleng hman lo niin a lang a, insel vak vakin kori a tu tawh lo a, fimkhur nan hmang tlang ila a tha ang.

Covid 19 hi Mizoram chu sawi loh khawvelin vawikhat a hmachhawnna a ni a, a sulhnu rapthlak zia sawi tam a ngai tawh lo a ni. Thuneitu lam tan pawh ngaihtuahna hman thiam a har khawpin a rinawm a, kalphung fel tak hi vawi leh khata awm nghal thei a ni loa, inrawn tawn a ngai a, tum miah loa tihsual deuh te pawh a awm thei a, chumi atang chuan kalphung tha zawk erawh a chhuak tur a ni thung ang. Covid 19 do kawngah hian Department hrang hrang te chu chanvo pek theuh an ni a, an inkarah thawhhona mumal zawk erawh kan mamawh zel dawn tih a lang bawk a ni.

Janata Curfew tlaiah khan covid 19 do kawnga a hmatawnga awmte tana hun hman a ni a, khatah pawh khan phai rama cheng thenkhat chu khawlaiah chhuakin an ri luih luih a, 'Kut' an hmang emaw tih mai turin intihhlimin hun an hmanga boruak an nei bawk a ni, inkaidarhna hun tha tak an in siam a ni leh ber a. Prime Minister in a thuchaha a tum an thelh chiang hle a, selna pawh a nasa a ni. Tun tuma Mizo mipui lamin bazaar-a punkhawm an duhlohna hian Sawrkar hlawh-tlinna a tilang a tih ngam a, mipui thuawih zia leh awareness in hna a thawh nasat theih zia a tilang a tih theih awm e. Hun khirh takah hian tangrual zel ila, engtik niah emaw chuan kan thil hmachhawn hi kan hneh ngei ring tlat bawk ang u.