ZALEN August 22, 2024: Vawiin tlai dar 4 khan Aijal Club R.B McCabe Hall ah Urban Development & Poverty Alleviation Department buatsaihin Aizawl Hmathlir buatsaih a ni a. Chief Minister Lalduhoma chuan he hun hi a telpui. 

CM chuan Assam Rifle ram chhuahsan hman dan tur chu zau zawka mipuite nena inrawn thaa a hriat thu a sawi a.

Chief Minister chuan, "World Bank chhut danin kum 2050 ah chuan mihring hmun thuma thena hmun hnih te hi khawpuiah kan cheng tawh dawn a ni. Aizawl tana UD & PA inbuatsaihna hi a fakawm hle a ni,' a ti. Aizawlin bawlhhlawh paihna mumal leh mamawh phuhru zo tak a mamawh dan te, thlanmual intawm a mamawhna te, kea kalna tur tam zawk te, parking-na tur tam zawk te, Market zau leh tha tak a mamawhna te a tarlang a. Kumin kumtir lama central sawrkarin Aizawl chhuah lam leh tlak lam bypass road thawhna tur a rawn sanction hi a hlawhtlin hunah chuan Aizawl khawpuia lirthei tawt lutuk hi a ziaawm hlein a rinawm, a ti bawk. 

Kal khawmte lawmna thusawitu K. Sapdanga, UD&PA Minister chuan, Aizawl Hmathlir chu UD & PA hnathawh tawh te, thawh mek te leh hmachhawp awm te inhrilhhriatna a nih thu a tarlang a. UD & PA Minister hmasa Pu Tawnluia hmalakna fakin a chungah lawmthu a sawi a. A hmalakna tha tak tak te chu kan chhunzawm zel dawn a ni, a ti. 

Inkhawm hi Zarzokimi, Jt. Secretary, UD & PA chuan a kaihruai a, Dr. Andrew H. Vanlaldika, Director, UD & PA chuan thupui pahnih: Aizawl khaw chhunga veivahna tha zawk ruahmanna (Aizawl Sustainable Urban Transport Project) - Ropeway/cable car, city bus service changtlung zawk, corridor & junction improvement, skywalks, regional Truck, Bus & Maxi Cab terminals, vertical mobility, multi level off street parking leh Assam Rifles insawn huna ram hman dan tur an ruahmanna te a lem nena entirin sawifiahna a nei a. Aizawl Sustanable Urban Transports Project bik hi Asian Development Bank funding hmanga thawh tura duan a ni.

C.C Lalchuangkima, CEO, Aizawl Smart City chuan thupui pahnih "Aizawl- Khawpui fai" tih leh "Integrated Command & Control Centre (ICCC) hman tangkai dan tur" hmangin thusawina a nei bawk a.

Khawpui faina hmalak meknaah hian Solid Waste Management Centre, Luangmuala sa tura hmalak mek te, Solid Waste Management Centre, Tuirial hmalakna hrang hrang te, Common Biomedical Waste Treatment Facility, Tuirial a sak thar kumin July thlaa hawn tak te, Hualngohmuna Construction & Demolition Waste centre sak mek te, leivung paihna tur ruahmanna te leh an hmalakna dang te a tarlang.

Integrated Command & Control Centre hi Smart City hnuaia Aizawl khawpui chhunga mipui leh lirthei che vel vilna lama hmalakna a ni a. Hmun 76 ah CCTV an dah tawh a, Automatic Number Plate Recognition System hmun 14 ah an dah tawh a, Free Public Wifi hi hmun 15 ah, Environmental Sensors hmun 4 ah, Variable Messaging Display hmun 4 ah, Facial Recognition System hmun 5 ah an bun fel tawh a, garbage truck 160 ah GPS Tracking Devise an vuah tawh a ni. Hmalakna pawimawh tak tak engemawzat an kalpui mek bawk.

Thupui sawituten an sawi lai hian a tul ang zelin Pu Lalmalsawma Pachuau, Secretary, UD&PA kaihhruaiin sawihona neih zui a ni.

Aizawl Hmathlirah hian Aizawl khawpui chhung bialtu MLA te, Aizawl Mayor, Deputy Mayor leh Corporators te an tel a ni.