October 27, 2022; ZPM Working President K. Sapdanga'n Mizoram politics chanchinah party pakhat a chhoh chuan a dang pakhat a chhuk a ngai tih sawiin, "A rualin party pahnih a than theihloh, kan chho mek a ni. Hmuntinah inthlan lehah chuan mitin 'ZPM-ah aw' an ti a, Aizawl khawpui bial 11 hi lak vek theih kan inbeisei a ni," a ti. 

Nimin a ZPM Siaha District huaihawt mi thar lawmluhna District Office-a neihah ZPM Working President chuan, "Aizawl khawpui bial 11 lak vek theih an inbeisei tih sawiin, "Thalaite khawvelah hian thalaiten beiseina sang tak nen min tinzawn bawk niin kan hria. Amaherawhchu, thuthluangin engmah a chhuak thei lo, rim takin i thawk ang u," a ti.

Party dangte chu mi sawi bawrhban lamah an ramtang ringawt tawh nia sawiin, "In leader-ah te leh in policy-ah te buai teh u, min rawn buaipui suh u' kan ti. Beih tur an insem a, ruling emaw min ti a niang. Hetianga min titute hi i khawngaih ngawt mai ila, i tawngtaipui ang u," a ti bawk.

K Sapdanga chuan, Zoram vantlang hawiher thlirin, inthlan lehah chuan mipuiten ZPM sawrkar an tinzawn nia sawiin, tun aia tha zawk Mizoram an beisei niin a sawi a. Covid chhuanlam dik tawk lo a tam thu te, Mizorama sum lut a tlem chuan loh thu te, a luhbingna erawh a awm thu te sawi bawkin, Kamrula’n harsatna a tawk ve ngai lo niin a sawi. 

"Chutihlaiin pensioner te, sawrkar hnathawk te leh mipui ten kan tuar a; zan thim hnuaia mangchhe mang mangang ang chauh kan ni," a ti a, "Mangangte inhlawmkhawm chu kan kalkhawm a, kan insawmkhawm a. Tichuan ZPM kan ti a, kan invenpuitawn a, kan inthlamuantawn a ni," a ti bawk.