Aizawl: Mizoram sawrkar chuan Aizawl khawpui hmun hnihah Covid 19 test duhte tana in-test-na hmun tur kiosk din a tum a. Tun dinhmunah chuan a mamawh zualte tan chauh Covid test hi tih theih a la ni.

Zalen thudawn danin mamawhte tana Covid 19 test-na hmun hi Bawngkawn South leh Chawlhhmunah te din tum a ni a, hemi atana thil tul hi buaipui mek niin hun reilo te-ah notification chhuah tum a ni. Tun dinhmunah foreign-a zin tur te, hna zawm tur te leh mamawh zual tan Rapid Antigen Test hmangin R.Dengthuama multipupose hall, Mualpui leh Directorate of Health Services, Dintharah te test kalpui a ni a. Heng bakah hian Aizawl khawpui hmun hnihah test-na hmun hi hawn thuai tuma hmalak mek a ni.

Zalen thudawn danin R.Dengthuama hall-a test hi notification chhuah la ni lo mah se mipui mamawhna a san tawh em avangin kalpui a ni a, mahni inringhlel in-test duh leh zin chhuak turte hi Rs. 500 chawiin RAgT hmangin test kalpui mek a ni a. R.Dengthuama hall-ah hian November thla tawp thleng khan mi 909 test tawh an niin positive mi 6 hmuh an ni. R Dengthuama hall-a thawkten Zalen an hrilh danin RAgT hi zin veivakte in-test ngai chauh an la ti hrih a. “In test duh lo kal tawp ang chu kan ti ngai lo,” tiin ZALEN zawhna an chhang bawk. Hetih lai hian Mizoram sawrkar chuan mipuite an duh huna man chawia Covid in-test theihna hmun zingah R.Dengthuama Hall hi a lo puang tawh thung a ni.

Bawngkawna South-a Covid 19 test-na tur pawh hi peih fel thawkhat a ni tawh niin Zalen chuan thu a dawng a; mahse, thawktu indaih loh avangin tun dinhmunah chuan test hi kalpui theih a la ni lo a, tlema nghah deuh a la ngai nia thudawn a ni.

Zalen thudawn danin Aizawl khawpuia damdawi in thenkhat chuan Covid 19 test hi an kalpui thei a; mahse, mi nawlpui test chu an tan a him loh theih avangin anmahni dawrtute chauh an test a ni.