Aizawl: Zirtawpni atang khan Aizawl leh Kolkata inkarah Indigo thlawh-na a thlawk tan leh a, July ni 9,2020 atang hian Mizoram district khawpui hrang hrangah helicopter service tir tan tum a ni bawk.

Zalen in Principal Consultant Aviation, J.Lalhmingliana hnen atanga thu a dawn danin Indigo Airlines hi kar khatah ni 3, Thawhtanni, Zirtawpni leh Inrinni ah te Aizawl leh Kolkata inkarah a thlawk thin dawn a. Air India chu Thawhlehni, Nilaini leh Ningani ah te an thlawk thung ang a, Pathianni ah chuan thlawhna thlawk a awm dawn lo a ni. Aizawl-Guwahati leh Aizawl-Delhi inkar thlawhna service chu Mizoram sawrkarin tul a la tih loh avangin thlawh tir a ni hrih lo tih sawiin J.Lalhmingliana chuan, "Delhi a thlawk tur hian airline 2 in thlawh an duh thu an sawi a. Mahse kan phal zau lutuk chuan tunlai hrileng nen kan buai phah ang tih kan hlau a. Guwahati pawh hi duh ila chuan service thei an awm a, mahse finkhur phawt hi a tula kan hriat avang leh passenger an lo luh tam lutuk chuan harsatna kan tawk thei dawna kan hriat avangin kan ti hrih lo a ni," a ti.

Principal Consultant Aviation chuan tunkar Ningani (9.7.2020) atangin Mizoram khawpui hrang hrangah helicopter service chhunzawm tir an tum tih sawiin, "Tun dinhmunah chuan kan state hi Covid-19 ah kan fihlim niin a lang a, chuvangin lockdown inkaihhruaina hrang hrang zawm chungin helicopter service tir leh turin hma kan la a ni," a ti bawk.