Aizawl April 8, 2024: Lok Sabha MP inthlanpui 2024 atan Aizawl leh Lawngtlai District chhunga Assembly Segment engemaw zat tan vawiin atang khan Home Voting kalpui tan niin, April ni 10 thleng a awh ang. Election Commission of India (ECI) ruahman angin kum 85 chin chunglam leh Persons with Disabilities te vote thlak tura polling station pan tura harsatna neite tan mahni in lum atanga vote an thlak theihna turin Home Voting hi kalpui a ni.

Aizawl District ah hian tun inthlanpui atan hian home voting atan mi 874 chhinchhiah niin, an zinga 54 chu Persons with Disabilities an ni. Hemi atan hian election duty ni engemawzat chu team 22 an inthen in Assembly segment hrang hrangah an kal a, Postal Ballot hmangin vote hi thlak a ni.

Lawngtlai district-ah hian Tuichawng bial-ah home voting dil 23 (senior citizen vek), Lawngtlai West bialah home voting dil 22 (senior citizen vek) leh Lawngtlai East bialah home voting dil 99 (senior citizen 95 leh PwD 4) an awm a. Lawngtlai District-ah a pum puiah home voting dil 144 (senior citizen 140 leh PwD 4) an awm a ni.

He Home Voting ah hian PwD te zingah hian rualbanlohna 40% tal leh disability certificate nei an nih a ngai a ni. Nikum MLA inthlanpui khan kum 80 chin chunglam tan home voting hi a dil theih a, inkaihhruaina thlak danglamin tun tum MP inthlanah hian kum upa lamah chuan kum 85 chin chunglam tih a ni.