September ni 10, 2020 Ningani kha Aizawla motor a rawn luh hmasak ber champha vawi 78-na a ni a, Mizo pa ngei, C. Rochhinga chuan Sairang atangin he motor hi Aizawl a rawn thlenpui a, he motor hi tun thleng hian eng motor nge tih chiang faka hriat theih a ni lo a, an chhui chin atangin Chevrolet company siam chu ni ngeiin an hria. A rawn khalh thlengtu hian a chungchang a ziahnaah he motor hi a ta a nih thu tar lanna a nei lo a, sipai a nih avangin sipai motor-a ngaih a ni.

Aizawl khawpuia lirthei lut hmasaber lalut tur hian tha leh zung an seng hnem hle a, he motor hi Karimganj district, Assam-a Lalaghat khuaah thiah darh vek a nih hnuah Lawngleng 50 rual hmangin rawn phurh chhoh a ni phawt a, Sairang an rawn thlenpui ni tak hi he thu buatsaih lai thleng hi chuan an hre thei rih lo. C. Rochhinga leh sap pa pakhatin a remkhawm hna hi an thawk niin, ZALEN thudawnna C. Rochhinga Memorial Society (CRMS) Chairman, K. Lalhundanga chuan a sawi. Remkhawm zawh a nih hnuah kum 78 leh ni thum kalta, September 10, 2020 khan Aizawl rawn thlenpui a ni.

Motor a rawn luh ni hian khatihlaia Bawrhsap A.G. Mc.Call, ICS chuan tlang a autir hial a, mipuite chu motor hlat thei ang bera awm turin a hriattir a. “Lo ngaithla vek rawh u, vawiinah Sairang atangin Aizawlah motor a lo lut dawn a, kawngpui atang a furlong khata hnaiah tuman thing phurh loh tur, a nghawr thla ang che u,” tiin tlangau hi a autir niin a fanu Remliani, Mission Veng chuan a sawi. Motor kalkawng lo vil tur hian labour eng emaw zat chu kalkawngah hian an duty-tir nghe nghe a, Sairang leh Aizawl inkar kawng hi tlawng lui atanga bungraw rawn kal lakchhawnna ber a ni chungin a la mumal lo tih a chiang hle.

Bawrhsapin tlang a autir dan erawh hi chuan ngaihtuah a ti thui thei hle a, Bawrhsap thuchhuak meuh a ni a, thil nuihzathlak a ni tawhna chen chu a awm.

Chutihrualin autirtu hi motor awm tawhna atanga rawn kal a ni ngei dawn a, Sap pachal hian Mizote hi min bawl nasa viau niin a ngaih theih. Furlong khat hi feet 660/metre 201.168 a ni a, motor kawng atanga hetiang zata hla a awm tan hi chuan motor ri pawh hriat a har ngawtin a rinawm.

Motor rawn luh tirh chungchangah hian tun hnua fiamthu anga sawi tak tam tak pawh a awm, a hunlai kha chuan lirthei tuman la hmu ngai hek lo, a hlauhawm tur zia kha. Fiamthua an sawi angin, feh kawngah motor a rawn ri bûng bûng a, khaw kilkhawr ve taka mite feh chuan enge a nih hre lovin kopang-ah an tlân lâwn a, an hlau ang-reng thin hmel khawp a. Mahse lirthei chuan muangchangin an awmna lai chu a rawn pêl ta mai si a, inmelh chungin, ‘A kawlh lo angreng hle mai,’ tiin an sawi fiamthu thin. Mahse, A mawh lo e, Bawrhsapin motor rawn luh tirha a tlangautir dan ngaihtuah hian hlauhawm chhuahin a chhuah tlat a ni.

C. Rochhinga hi Aizawl-a motor rawn khalh lut hmasaber a ni satliah ngawt lo a, ani hi khatih lai khan Sipaiah mechanic a lo zuk ni tawh a, electrical lam thiam a ni. Silchar-ah mechanic a zir hnuah private-ah te a inhlawh hnuah indopui-II chhuah hma chhovah sipaiah hian a lut a, Mizoram khawpui bera motor lakluh a nih naah pawh hian a thawhhlawk hle a, Aizawl-a workshop hmasaber dintu a ni bawk. Indopui II hnu khan sipai lamah kir tawh lovin Kum 1945 bawr vel khan C. Rochhinga hian sipai a bansan niin a chhungte lam chuan an sawi a, a rawn chuan chhuh hnu hian workshop a din a, he hun lai vel hi chuan Aizawl-ah hian motor 4/5 vel awm niin a puala din society te chuan ZALEN an hrilh. A sulhnu hi C. Rochhinga Memorial Society (CRMS) chuan chhui zel tumin hma an lak mek tih an sawi bawk.