ZALEN Feb 28, 2025; February ni 18, 2025 a hawn, Hangi Lunglen Tlang a Aizawl Peak Resort Skywalk chu tlawhtu an thahnem thei hle.

ZALEN thudawn danin, Aizawl Peak Resort Skywalk hi Mizote mai bakah, hnamdang te pawhin an hlut niin a lang a, a tira siamtute beisei aia nasa in tlawhtu pawh an tam. "Tawngtai mite hnen atangin tawngtai puina kan dawng nasa a, a hmuna rawn tawngtaite, ral atanga tawngtai sakna te kan dawng nasa," tiin a hmunhma enkawltute chuan ZALEN an hrilh.

He Skywalk Structure hi Nail India Adventure Private Limited, Pune te siam a ni a, Glass Panel hi Toughened Glass 30mm a chhah, meter 10 a sei, meter 2.24 a zau a ni a. Meter khat bial hian puitling 7 a dawl zo a, a glass chinah hian mi 135 a ruala awm thei tura duan a ni.

An enchhinnaah chuan sand bag kg. 9,500 vel zet an dah a, a him tawk hle. A him leh him loh hi NIT Mizoram ten an endik a, kg. 100 veka rit mi 150 pawh a rualin kal se, a dawl zo hle dawn niin an ngai. A enkawltute chuan a rualin mi 20 aia tam lo vel zel an kaltir thung dawn niin an sawi.