Coordination Committee on Traffic Management tun hnaia thukhawm chuan June 2019 atangin Aizawl khawpuiah lirthei tlan dan thar a ruahman a, tuna lirthei intlanchhawk kan kalpui mek hian traffic jam a tihziaawm loh vanga he ruahmanna hi kalpui tum niin a lang a. Aizawl khawpui tana ruahmanna thar hian rah tha chhuah thei se a duhawm hle mai.
Aizawl khawpui hi ruahmanna felfai awm lova thang chho a nih avangin in sak dan leh kawng chungchangah pawh a rem ang anga tih nawk nawk zel a ni a. Aizawl Municipal Corporation in insak dan turah ruahmanna thar leh dan zawm tur an duan hnu hi chuan kan insak dan pawh a ziaawm chho ta hle a, chutih rual erawh chuan lirthei a pun zel avangin hmanhmawh thilah phei chuan chet a harsa ta hle mai.
Aizawl hi ruahmanna felfai awm lova thang chho ni bawk mah se tlangram khawpui dangte ngaihtuah chuan kan kawngpui hi chu tê chhe lutuk a ni lo. Tuna kan harsatna ber nia lang chu kawngkama in saten kawng kan nek tlat mai zel leh kawngsira lirthei kan dah tlat thin hi a ni. Kawngpui sirah hian lirthei leh hmanrua dah lo ila chuan tun ang em em hian harsatna kan tawk lo ang.
Mizoram sawrkar chuan lirthei neitu ten an lirthei dahna tur ‘garage’ an nei ngei tur a ni tiin hriattirna a ti chhuak a, garage nei lote pawhin an ngaihtuah chuk chuk a. Mahse, a bawhzuina kawngah sawrkar a chak tawkloh avangin ngaih pawimawh a hlawh zui ta lo a ni. Sawrkar hian chak lehzualin bawhzui thei se chuan kan harsatna tam tak hi chu sutkian a nih a rinawm.
Tuna pawimawh hmasa ber nia lang chu parking area mumal leh tha tak neih hi a ni. Sawrkar hian a hnuaia department hrang hrangte hi parking tha nei vek turin ti se, sawrkar ram leh hmunawl remchang bakah mi mal in remchang ang angte hi multi level parking-ah te siam nise tuna kan harsatna zualpui hi chu a reh a rinawm e. Traffic jam vanga harsatna kan tawh kan hre theuh a, mi tupawh min nghawng avangin sawrkar ruahmanna thar hi hlawhtling ngei se a duhawm hle mai.