Aizawl: State Investment Programme Management and Implementation Unit (SIPMIU) chuan Tlawng lui tui lakna tura tui pipe an phum chu 75% vel an zo tawh niin an sawi.

Zalen-in SIPMIU Project Director Er. Lalrothanga an kawmnaah he thu hi sawiin, hmabak an nei tam tawh lo hle niin a sawi a, Sakawrtuchhun ram chhunga Industrial Growth Centre peng leh Ramrikawn inkar, Vaivakawn Zohnuai leh Chanmari West peng leh Chanmari West Kawipui leh Laipuitlang inkar bak pipe phum tur an neih tawh loh thu a sawi.

SIPMIU-in pipe an phum hi tuna Aizawl chawmtu tui lak mek duhkhawp a tlin tawh loh avanga tui khamkhawp Aizawl khawpuiin a hmuh theihna atana ruahman a ni a, tui lakna hi a zawh hun tur chiah erawh sawi theih a la nih loh thu Zalen an hrilh bawk.