Aizawla buatsaih tur walkathon-ah km nuai 2.5 kal tawh

ZALEN, Mar. 19, 2025: Natna inkaichhawn theih loh hrang hrang do nana kea kal rûnpui, Walkathon 2025 buatsaih mek zelah hmun 500 chuangah mi sing ruk chuangin km nuai 2.5 chuang kein an kal tawh a. Aizawlah pawh Zirtawpni tuk hian buatsaih a ni dawn.

Walkathon 2025 hi Mizoram Health Systems Strengthening Project, H&FW Department-in Mizote nunna suattu zinga natna inkaichhawn theih loh lar tak tak – zunthlum, BP sang, cancer, stroke leh heart attack dona atan an buatsaih a ni a. February atang khan khua/veng 500 chuangah huaihawt tawh a ni.

Walkathon buatsaih tawhah hian mi 67,002 thawk chhuak tawhin km 2,56,299 an kal tawh a. Aizawl khawpui chhunga chengte tan hmun sarih atanga chhuah turin Zirtawpni zing dar 6:00 hian buatsaih a ni ve ang.

Khatla, Sikulpuikawn, Chanmari, Chaltlang, Chhinga Veng, Dinthar (NHM Office kawt) leh Ramhlun South atanga chhuakin AR Lammual thleng kea kal rûnpui hi buatsaih a ni ang.

Aizawla walkathon buatsaih turah hian Health Minister Lalrinpuii chuan mipui a tam thei ang ber tela heng natnate do nana mipui leh sorkar thawhhona lian ber, record tha tak siampui tur leh Zoram hrisel din turin chhung tinte a sawm.