Aizawl : Osama bin-Laden thah a nih hnua al-Qaeda kaihruaitu, kum 71 mi, Egyptian surgeon Ayman Mohammed Rabie al-Zawahiri chu drone hmanga beihnaah kar tawp khan Kabul, Afghanistan-ah a thi tih US official-te chuan vawiin khan an puang. 

Tuna zawhna lian ta ber chu al-Qaeda-ah hian tu nge Zawahiri ai hi awh ta ang tih a ni a, a aiawh tur zingah hian Saif al-Adel, Abdal-Rahman al-Maghrebi leh Yazid Mebrak of al-Qaeda (Islamic Maghreb (AQIM) bakah Ahmed Diriye of Al-Shabaab te chu hming langsar te an ni. A aiawh tur hi tihchian erawh engmah a la awm lo.

UN Security Council-in July 15, 2022 a report a pek danin, Taliban-ten Afghanistan an lak atang khan Al Zawahiri dinhmun pawh hi a tha chho hle nia ngaih a ni a, al-Qaeda dinhmun pawh Afghanistan inkaihruaina hnuaiah hian a tha viau ang nia hriat a ni. 

Taliban-te hi an dinhmun avangin chet harsat viau tawh mah se, khawvel pum huap anga che tur chuan al-Qaeda hi dah san zawk an ni. Al-Qaeda hian Taliban sawrkarah hian adviser hna an thawk a ni ber a, an inkar pawh hi tha viaua ngaih a ni. 

Aiman Muhammed Rabi al-Zawahiri (QDi.006)  hian tun hnaiah al-Qaeda tantute hnenah video leh message a thawn hnem hle a, a thuchhuakah ngei pawh al-Qaeda chu ISIL tluka thuam a nih tur thu a sawi a, hei hi khawvel huap hruaitu a nihna a tihlanna pakhat niin UNSC report chuan a tar lang. 

Al-Qaeda hian Afghanistan-a Taliban-ten ro an rel hnu hian zalenna zau zawk an nei a, mahse, an dinhmun dik takah erawh an buai. Indian sub-continent-ah hian AQIS tih a hriat lar niin fighter 180-400 vel an nei a, anni hi Bangladesh, India, Myanmar leh Pakistan mi leh sa an ni ber. AQIS fighter-te hi Taliban combats units-ah hian mi mal angin an inziak lut deuh ber a ni.