Mithiamte chuan mipa aiin hmeichhia ten Alzheimer neih theihna chance an nei sang zawk tih an hmuchhuak. Alzheimer hi rilru lam buai natna ti ila a chiang mai awm e, kum upa lamah a nasa a, chutah pawh mipa aiin hmeichhiaah a hluar zawk nia tarlan a ni. 

Women’s Alzheimer’s Movement, Cleveland Clinic ten an zirchianna atanga a lan dan chuan, hmeichhia 82% hian Alzheimer vei theihna chance sang tak an nei tih an inhre lo a, an thluak hriselna chungchang doctor an sawipui ngai lo bawk tih an hmuchhuak. Hmeichhia bikah hian kum 65 an tlin chuan, mi panga zela pakhatin Alzheimer neih theihna chance an nei anga chhut a ni. 

Khawvela ram ropui ber US-ah chuan kum 65 chung lam Alzheimer nei mi maktaduai 6 zet an awm a, chung zinga maktaduai 4 vel zet chu hmeichhia an ni. Hmeichhiate zinga Alzheimer a hluar chhan hi zirchianna neih a ni a, University of Chicago leh Boston University School of Medicine te chuan 'gene' thar 'MGMT, O6-Methylguanine-DNA-methyltransferase' an hmuchhuak a, hei hi a chhan ber chu a ni. Hetih lai hian mihring dam reichhung chawhrualah hmeichhia aiin mi pa an dam rei lo zawk thung. 

Alzheimer lakah hian inven vek theih ni lo mah se vei theihna chance erawh tih hniam ve theih a ni. Nitin taksa sawi zawi a tha a, chu chuan mihring thluak (brain) a cell a pui a, thluaka thisen leh oxygen chevel a tichak a ni. Chaw ei that a pawimawh a, thlai leh thei ei tam a tha viau bawk. 

Zirchianna atanga lang pawimawh tak pakhat chu, khawtlang nena inzawmna nei thate tan Alzheimer neih theihna chance a tlem bik tih hi a ni. Midangte nena inlaichinna tha neih chuan Alzheimer lakah eng emaw chen a veng a, hriatna tlakhniam theihna a tiziaawm thei bawk tih an hmuchhuak bawk. Hei hi social stimulation hmanga thluaka nerve cell inzawmna tichaktu direct mechanism vang pawh a ni thei tih mithiamte chuan an sawi bawk.