ZALEN, Mar. 26, 2025: Chief Minister Lalduhoma chu Nilaini khan ama thehluh criminal case pahnih kaihhnawihah court-ah darkar li chhung thu zawh fiah a ni.

Chief minister hian May, 2023 leh May, 2020-a amah tihmualpho theihna leh dan a bawhchhia nia ngaih theih tura social media leh titi darh chungchangah thubuai a thehlut a. Hemi kaihhnawihah hian Judicial Magistrate of First Class III court-ah defence councel hmaa a inlan ta a ni.

Thubuai pahnihah hian chawhma dar 11:30 atanga tlai dar 3:30 thleng thu zawh a ni a, court chhungah hian mi nawlpui luh erawh a theih loh thung.

Chief minister hian May, 2023 khan December 7, 2013-a Sihhmui, Tlawng kama mi pakhat, silaia kahhlum kaihhnawihah amah chu mawhphurtu anga ngaih theihin social media-ah thu thehdarh a awm nia sawiin Criminal Complaint No.130 of 2023 a thehlut a, ‘thu thehdarhtute hian a zahawmna an tibawrhbang’ tiin a thlen.

May, 2020-a thubuai a thehluh hi ‘Dawrpui JAC-ten nula nena an awm dun lai an man’ tia a chungchang sawina darh vanga a thehluh niin ‘intihmualpho a ni’ tiin court-ah a thlen a ni.

He thubuai, Criminal Complaint No. 14 of 2020-ah pawh hian a thu sawite a dik ngei em tih finfiah turin court hian a inlan nghal a, defence counsel-ten thu an zawt fiah (cross exam) bawk a ni.