ZALEN Aug. 8. 2024; Ambulance driver PC. Lalromawia'n kawng lakah ṭha takin nau a chhara, nau a chhar hnuah doctor thurawn angin him takin Aibawk damdawi in a thlenpui.

ZALEN thudawn danin, National Ambulance Service (NAS) driver, PC. Lalromawia hian August ni 5, 2024, Thawhtanni khan Serchhip district hospital atanga ZMC a refer, nau nei tur (raipuar) chu ambulance-ah a phur a, September/October a nau nei tura ngaih a ni.

Ambulance-ah hian driver leh ZMC a refer nau nei turte nupa an chuang a, kawng laka an tlan lai, Midum kham an thlenin, a tuibawm a keh a, Ṭhiak an thlenin loh theih loha nau chhar ngaiin a awm a ni.

NAS driver hian theihtawp chhuahin nau hi a chhar a, a lai hrui chhatin, ṭha takin a chep a, ambulance a hmanraw awm ang angte tangkai takin a hmang.

A nau chhar hi hmeichhia niin, nau a chhar zawhah Aibawk doctor thurawn angin rang takin Aibawk damdawi in a panpui nghal a ni.

Ṭhiak-ah hian a khaw mi ten an theih ang angin an lo puibawm bawk a, nau chhar thiam a thlen erawh chuan nau hi chhar fel a ni tawh.

Naute nu leh pate pawh an lawm hle a, nau chhartu driver hnenah a hming phuah sak turin an ngen hial a ni.

Nau chhartu NAS driver PC. Lalromawia chuan, a vawi khat nau chharna a nih thu sawiin, Pathianin a hun takah a hmang nia a hriat thu leh naute leh a nu pawh an ṭhat chhoh zel a beisei thu a sawi.

PC. Lalromawia hi Serchhip district hospitala thawk, medical quarterah a nupui leh a fa pathumte nena khawsa mek a ni.