Aizawl: Aizawl Municipal Corporation inthlanna atana electoral roll peihfel takah a hmaa draft roll tarchhuah aia final roll a voters an punna chu 1242 a ni.

AMC Draft roll ah voters 218870 awmin final roll ah voters 220112 an awm a, heng te hi mipa 102086 leh hmeichhia 118026 te a ni. Aizawl Municipal Corporation a Ward 19 awm zingah draft roll nen khaikhinin ward 16 ah voters an pun laiin ward 3 ah an kiam thung a, voters an kiamna bial te hi Ward no III, Ward no IX leh Eadr no XVII te an ni a. Voters pun tamna ber bial chu Ward no XII niin draft roll aiin voters 244 in a pung a ni. Electoral roll buaipuitu Aizawl DC Office a Election branch thawktute chuan bial thenkhata voters an kiam/tlem zawk chhan chu voters inthunthar tur an awm loh laiin paih tur an awm thung vang niin an sawi a, roll atanga paih te hi a tlangpuiin hnamdang (vai) te niin an sawi bawk. AMC draft roll hi ni 1.12.2020 khan mipui en theihin tarchhuah a ni a, ni 5.12.2020 thleng roll a luh, paih leh siamthat dilna chi hrang hrang hawn a ni a. Ni 21.12.2020 khan final roll hi tarchhuah a ni.

AMC roll atanga a lan danin Ward no XVIII chu voters tamna ber a niin voters 17585 an awm a, voters tlemna ber chu Ward no VIII niin voters 7232 an awm a ni. Polling Station a voters tamna ber chu Venghlui II niin voters 1197 an awm a. Voters tlemna ber Polling station chu PTC Lungverh niin voters 378 an awm a ni. State Election Commission chuan polling station pakhatah voters 1000 hnuailam awm se tih chu a duhdan a ni a, mahse Venghlui II bikah hi chuan tihngaihna a awm lo niin Election official te chuan an sawi.