Aizawl August 26, 2022 : Aizawl Mayor Lalrinenga Sailo chuan vawiin khan Aizawl khawpui bawlhhlawh tawih thei tlingkhawm atanga AMC-in leitha (Compost) an siam zawrhna tur Dawr (Stall) a hawng a, Leitha hralh chhuah thei a nih ta chu lawmawm a tih thu a sawi. He leitha AMC Compost hi a duh apiang tan AMC Office hnuaia dawr hawn takah hian lei theih nghal a ni.

AMC  hian January thla tawpah khan SIPMIU hnen atangin Tuirial-a Waste Management Centre hi an la chhawng. An dinhmun sawiin Lalrinenga chuan, "Kan inlahchhawn hian sum leh pai a ken tel loh avangin AMC pawisain kan enkawl zui ta a ni. Aizawl bawlhhlawh hi a tam tawh em avangin Waste Management Centre pakhat chauh hian a dawlzo tawh lo a, AMC-in sum leh pai a ngah bawk si loh avangin sawrkar tanpuina pawh kan mamawh zel dawn. Bul kan tan ve dawn chauh a ni a, kan ruahmanna hlawhtling a la tam lo va; chuti chungin bawlhhlawh hman nawn theih, 'Recyclable Waste te sumah chantir a,  vawiinah Leitha hralh chhuah a ni thei hi ka lawm takzet a ni," a ti.

Aizawl Mayor chuan AMC mai ni lo, Mizoram pum tan hmasawnna nia a hriat thu a sawi a, "Aizawl-in kan tih theih chu midangin awlsam takin an lo zir thei dawn a ni," a ti.

AMC-a Solid Waste Management changtu Executive Councillor Laltlanzova Khiangte pawhin thu sawiin, "India ram khawpui changkang zawka Municipal-ten bawlhhlawh atanga thil an siam chhuahte kan hre tawh thin a, AMC-in kum chanve chhung lek Waste Management Centre kan enkawl ve hnuah bawlhhlawh atanga lei tha kan siam hralh chhuah theih a ni ve ta mai hi AMC tan thil pawimawh tak a ni. Bawlhhlawh atanga lei tha siam hi thil namai lo tak, India ram Municipal tam takin an la tih ve theih loh a ni a, AMC-a thawktu zawng zawngte leh Leitha siam tura kan partner-te ka chhuang tak zet a ni. Waste Management hi tanrual ngai tak a ni a, ram hruaitute nena kan tanrual theih chuan plastic paih mai mai tur te pawh hi kawngpui siam na'na kan hman ni te pawh a la thlen ka beisei," a ti.

AMC hian lei tha siam tur hian firm pakhat, 'Waste Tech & Bio Energy an thawhpui a; lei tha hi kg 15 bag leh kg 25 bag a awm a; mipui hnenah kg-ah Rs. 10/- hisapa hralh chhuah tura ruahman a ni.