August 18, 2022; AMC in property tax pe lote tan a 'Grace Period' a hawn May - July, 2022 chhungin mi 50 in tax an pe a, chumi atanga hmuh chu Rs. 4,80,550 a tling. A hun a chhiah pe lo, grace period hawn chhung a property tax pe bawk si lo te chung ah AMC chuan inhriatthiamna a kalpui tawh dawn lo.

AMC chuan sawrkar kum kalta leh a hmalama property tax pe lote tan, hremna (penalty) chawi lova tax ba pek theih hun (grace period) May-July thla chhung khan a hawng a, hemi hun chhung a property tax pe lote chuan penalty 10% an pek tel a ngai tawh dawn a. Property tax pe lote chuan AMC a mamawh an dil kawngah harsatna an tawk a nih pawhin an sawi buai thei lo ang tiin AMC in hriattirna a tihchhuah ah tarlan a lo ni tawh.

ZALEN in AMC hotute hnen atanga thu a dawn danin, grace period hawn chhung khan a hun a tax pe lo mi 50 in property tax an pe a, chumi atanga tax hmuh chu Rs. 4,80,550 niin, a hun a tax pe lo, grace period hawn chhung a pe bawk si lo mi thahnemtak an la awm.

AMC chuan kum 7, 2015-16 atanga 2021-22 chhungin property tax atangin cheng nuai 1839.42 an hmu tawh a. Kum liam ta 2021-22 chhung khan cheng nuai 321.71 an hmu a, kum kal mek 2022-23 ah target cheng nuai 400 an nei. 

AMC huam chhungah property tax 3% lak thin chu, 2022-23 atangin 3.42% a lak tur a ni tawh dawn a, a sanna tur hi 0.42% a ni. Property tax hi mimal leh sorkar in (building)-ah a hlutna chhutin (unit area value system) khawn a ni a, sorkar laipui building-ah chuan khawn a ni lo.