Aizawl ; Nimin khan AMC Ward No XII huamchhungah MNF Unit Joint Campaign Kick-Off leh Ward Manifesto tlangzarhna hun Dinthar Community Hall-ah hman a ni. Lalruatkima, Minister & MNF Adviser leh Lalrinsanga Ralte MLA-in an hmanpui a ni.

He hun hmanpuitu leh bialtu ni bawk Lalruatkima chuan, "AMC hi Congress-in kan din an ti a, a paitu leh hringtu chu MNF a ni. MNF sorkar-in dante siamin a tul ang a tihfel hnuah MNF sorkar a tlak tak avangin inthlan an huaihawt ve mai chauh a ni," a ti a. "Party hrang hrangin AMC-ah sorkarna kan chelh tawh hlawm a. Tun tuma tha bik anga rawn insawi tharte hi an that bik lohzia mipuite hian kan lo hre tawh. AMC musical chair ti hiala rorelna mumal awm thei loa siamtute kha Congress leh tuna ZPM inti ta te hi an ni. Mi ngai rengte kha kawr dang hain an rawn inlan thar leh a, mipuite hian tute nge an nih chiah tih hi kan chiang a ni," a ti a. "AMC hnathawk tak tak thei nei tur chuan State-a sorkar lai hi kan sorkar ngei a ngai a ni," a ti bawk.

Ward No XII Candidate R Thanglura pawhin thusawiin, "Aizawl khawpui leh Ward hrang hrangah hmasawnna hna tha takin thawh mek a ni a. Chu hmasawnna hna kal mek sorkar tha chakna nena thawk chhunzawm turin MNF candidate-te min thlangtling leh turin mipuite kan ngen a ni," a ti.