ZALEN September 6, 2023 : Comptroller & Auditor General of India report in City Park cheina ah dan dik lovin vaibelchhe 1.01 an hmang nia a tarlan chungchangah Aizawl Municipal Corporation chuan DPR ang lo deuha hnathawh niin an sawi.

AMC thuchhuah chuan Aizawl khawpui cheina tur atan a Atal Mission for Rejuvenation and Urban Transformation (AMRUT) scheme a component awm zinga pakhat ‘Green Space & Parks’ atanga tih turin Aizawl City Park-ah cheng vaibelchhe 1.013 senga cheina tur detailed project report, UD&PA in a siam chu ni 18.04.2016 a State Level High Power Steering Committee (SLHTC) thu khawm chuan a pawm a.

Ni 23.05.2016 a SLHTC thu khawmin AMC khawih tur atan AMRUT component pahnih –Urban Transport leh Green Space & Parks chu a tih tak avangin AMC chuan hma a la nghal a, amaherawhchu City Park hi Aijal Club enkawl anih avangin Aijal Club-te nen meeting ni 01.08.2016-ah neih a ni a, hetah hian DPR siamthat a ngaih thu sawi a ni a. Revised DPR chu pawmpui turin Director, UD&PA hnenah ni 21.12.2016 ah thawn a ni a, chu DPR-ah chuan Aijal Club nen a MoU hi telh a ni bawk a. Ni 23.01.2017 a State Level Technical Committee (SLTC) thukhawm chuan a pawm a ni, an ti.

AMC thuchhuah chuan hnathawh chhung hian Aijal Club aiawhte nen hnathawh dan tur leh thawh chin te enho zel a ni a, contractor pawn hna tha tak a thawkin ni 31.08.2018 ah a thawk zo ta niin an sawi a. Hnathawhah hian a chang chuan DPR ang lo deuh a thawh a ngaih changte a awm thin niin an tarlang bawk.