ZALEN September 3, 2023 : Aizawl Municipal Corporation (AMC) chuan City Park cheina atan dan dik lovin Rs. vaibelchhe 1.01 an hmang niin CAG report-ah tar lan a ni.

August 23, 2023-a Comptroller & Auditor General of India report, Assembly House a pharh takin a tar lan danin Atal Mission for Rejuvenation & Urban Transformation (AMRUT) sum Rs. vaibelchhe 1.01 hmanga City Park chei thatna atan AMC leh Aijal Club thuneitute chuan October, 2016 khan inremna an ziak.

Inremna ang chuan he sum hmang hian Rs. nuai 14 man naupang infiamna hmanrua - pipu, tawlhpahrit leh infiamna hrang hrang dah tur a ni a. Hei bakah hian Rs. nuai 3.02 hmangin Gate No. 2 siam tur a ni bawk a. Mahse, hengte hi siam lovin thil dang atan hman a ni a, a vaiin Rs. nuai 17.02 chu hmun dangah pawhpen a ni tih a tarlang.

CAG report chuan AMRUT guideline-ah chuan mipuite mamawh chi hrang hrang - tui in tur, veivahna awlsam siam, intihhlimna hmun (park) siam te a ni a. Mahse, AMRUT inkaihhruaina kalhin thiltih niin City Park chu eng emaw exhibition leh fair-ah te chauh mipui tan luh theih a ni a. Mipui nawlpui tan luh theih a ni lo a, mipui sum hmanga siam ni si gate a inkalh reng bawk.

Hei bakah hian City Park luhna atan hian lei dawh a niin chu lei hmang chuan Aijal Club atang chauhin kalpawh theih a ni tih a tar lang a. Pawisa Rs. vaibelchhe 1.01 sum hmanna hi club member-te chauhin an chhawr/hlawkpui a nih avang leh mipui vantlangin an hlawkpui ve loh avangin AMRUT inkaihhruaina (guideline) kalh a ni tih a tar lang bawk.