Aizawl 23, 2024 : Aizawl Municipal Corporation (AMC) chuan Aizawl khawpui fai leh thianghlimna turin Mizoram Municipalities Act 2007 leh AMC Solid Waste Management Bye-Laws 2019 hmangin hma a la chhunzawm reng.

August ni 19-23, 2024 chhung hian hetiang hian dan bawhchhiate chungah hma a la a, mi 13 pawisa an chawitir. Dan bawhchhia mi 29 hriattirna an pe.

Tui luankawra bawlhhlawh paih pawisa chawi tir - 12

Phal lohna hmuna leivung paih vanga pawisa chawi tir -1

Septic tank enkawl tha lo leh soakpit tel lo a septic tank hmang siamtha tura hriattir - 24

Heng bakah hian midang tana rimchhia leh hnawksaka Vawk vulh chhungkaw 1 chu huntiam chhunga an vawk ti ral tura hriattirna lehkha pek a nih bakah tuichhe luanna fel lo chhungkaw 4 te pawh an tuichhe luanna siam tha nghal tura hriattir an ni bawk.

AMC chuan Central Pollution Control Board thuchhuah leh Plastic Waste Management Rules 2016 te bawhzuiin AMC Plastic Waste Management Bye-Laws 2019 a siam a. Heng dan te hnuaiah hian Phal loh Hman khat daih plastic (Banned Single Use Plastic) te ti rem turin hma a la mek bawk a.

Tunkar chhung khan banned SUP hi kg 72 man a ni a. AMC chuan faina leh thianghlimna leh Single Use Plastic hman khap te chungchangah hriselna atan leh leilung venhimna turin kaihhruaina te ngai pawimawh turin mitin a ngen a ni.