Aizawl September 5, 2022 : Aizawl Municipal Corporation a Enforcement Committee chuan dan lekkawh kawngah khauh leh khawng taka kal an tum tih an sawi.

AMC Office, Thuampui a chanchinbumite an kawmna ah he thu hi sawiin Enforcement Committee chairman John Zosangliana chuan, "Aizawl khawpui nuam taka siam turin kan dan neih sa hmang hian tan lak thar leh kan tum a. Tun a kan kal phungah hi chuan permit hi kan pe ve tawp hi a ni deuh mai a, a tu a te pawh AMC pawh kan Techinical Person te pawh, kan Local Council te pawh mipui pawhin kan tih tur theuh hi kan ti tawk lo niin a lang a ni," a ti.

Enforcement Committee chuan, "Building permission kan pek chhuah hian kan Techinical Person (Registered Engineer) te hian drawing angin bul an tan pui ang a, a tawp thlengin mawh an phur tur a ni a. A bul tan lai tak, ban phun na tur dik inkawhhmuh hi an hna hmasa ber leh pawimawh te zinga mi a ni a, an kawhhmuh dan anga in neitu ten an ti duh lo anih chuan rang takin AMC ah an hriattir tur a ni ang. Local Council ten in sa dik lo an hmuh chuan an Stay vat ang a, Office-ah an rawn report tur a ni," a ti.

John Zosangliana chuan kum khatah permit pek chhuah 3000 vel nia sawiin dan zawm that anih chuan Aizawl nuam kan siam thei dawn niin a sawi a. Dan zawm lova in sa complaint 15 zinga 13 ah hman la tawh nia sawiin a dang 2 hi zirchian mek a ni tih a sawi bawk.

AMC Deputy Mayor R.Thanglura chuan slope modification hman tan November 2021 atanga August ni 12,2022 inkar chhungin building permission 1000 an pe tawh niin a sawi.