ZALEN March 21, 2025 : AMC ruahmanna zawma AMC Multi-Complex, Tuikual South-ah Treasury Bazar Association te chu an insawn lut dawn a, amaherawchu an ngenna angin March ni 22, 2025 thlengin AMC chuan kawngpui kama inpho a phalsak a. Hmun dang atanga Inrinnia inpho thin te pawh inpho phalsak a la ni dawn tih AMC thuchhuak chuan a tarlang.

AMC chuan Treasury Bazar Association chungah lawmthu a sawi a. Venghlui leh Tuikual South Local Council ten AMC hmalakna kawnga harsatna siam loa an tawiawm avangin AMC chuan an chungah lawmthu a sawi.

AMC thuchhuak chuan March ni 22, 2025 hnu lamah chuan kawng kama inpho hi khap a ni tawh dawn a ti a, thil zuar duhte chuan AMC Multi-Complex, Tuikual South Building ah insawn a tul tawh dawn aan ti. Tin, Aizawl veng hrang hranga kawng kama inpho te pawh a tahtawlin khap a ni dawn tih an thuchhuakah hian tarlan a ni bawk.

Aizawl mipui ten khawpui thianghlimna atan leh inrelbawlna a felfai zawknan AMC hmalakna hi zawma, lo thlawp theuh turin mipuite an ngen bawk a ni.