ZALEN March 18, 2025 : March 17 zinga Treasury Bazar kang senghawi hna chu vawiin khan Bazar-a thu ten a thenfai hnatlang an nei a, naktuk atang hian thut nghal an tum niin sawi a ni a, hetihlai hian AMC chuan bazar luhna chhak leh thlangah gate an siam.

Venghlui Local Council leh Tuikual South Local Council te chuan nimin khan thuchhuah intawm an siam a, hetah hian Treasury bazar-a kangmei chhuak avanga tuartu nitin eichawp zawngte an tawrhpui thu leh pawi an tih thu an tarlang a. Chutihrualin Bazar hi tha zawka chinfel thuai a nih theih nan kangmeiin a tichhiat sawrkar department te bungrua senghawi leh siamthat hna thawh bak chu tumahin kut lo thlak rih lo turin ngenna an siam a ni.

Nimin khan bazar-a thu thin te chuan an hmunhma te hi an senghawi a, naktuk atang hian thut hman an tun. Hetihlai hian AMC chuan an Gate hi zan lamah kalh tum niin thu dawn a ni a. Treasury Bazar-ah hian thut rih an phal dawn lo niin sawi a ni.

Treasury Bazar kanng hi Thawhtanni chawhma khan AMC Mayor Lalrinenga Sailo chuan a tlawh a, hemi tum hian helai hmun hi bazar atana hman leh tura siam that tum a nih tawh loh thu a sawi.

Chhinchhiah danin Venghlui area lamah dawr 53 a awm a, heng zinga 35 chu a kang chhia a, Tuikual South lamah hian dawr 41-ah dawr 29 a kang chhe bawk a ni.