August 11, 2022; Joint Municipal Commissioner, Aizawl Municipal Corporation (AMC) chuan Tuikual luia bawlhlawh (solid waste) paih thin, thingpui dawr neitu mi pali (4) te chu insawifiah turin a hriattir.

Hemi chungchangah hian Joint Municipal Commissioner, H. Lalhmingthanga chuan Ebenezer Medical Centre, Chawnpui bula thingpui dawr neitu mi 4 te chu insawifiah tura hriattirna lehkha August ni 4, 2022 khan a pe a, Tuikual luia bawlhlawh an paih chhan chu August ni 12, 2022 (Zirtawpni) ral hma ngeiin ziaka insawifiah turin a hriattir a ni.

Joint Municipal Commissioner chuan thingpui dawr neitu mi 4 te chu an thingpui dawr thlang/hnung lam Tuikual luiah bawlhlawh (solid waste) an paih thin tih hriat a nih thu tarlangin, phal lohna hmuna bawlhlawh paihtute chu 'The Mizoram Municipalities Acts, 2007' leh 'AMC Solid Waste Management Bye - Laws, 2019' hmanga hrem theih an nih thu te a tarlang bawk.

AMC Commissioner chuan June ni 8, 2022 khan, Chawnpui Local Council in an veng ram chhungah, AMC atanga phalna la loa Accountant General Office leh quarters hmun laihna leivung an paihtir chungchangah ni 10 chhunga insawifiah turin Chawnpui LC chairman a lo hriattir tawh bawk.