Aizawl November 10, 2022 : Aizawl Municipal Corporation chuan tunlai hian Aizawl khawpui chhunga kawngsira inzuar (street vendor) te tan felfai zawka inzawrhna an neih theihna tur Street Vending Plan an buaipui mek chu tunkar hian zawh hman an inbeisei.

AMC Dy. Mayor R. Thanglura, Vending changtu hovin AMC-a thawktute chuan AMC huamchhunga veng tinah endik hna hi an kalpui a, Street Vending Plan hi Corporator leh Local Council te nen Aizawl veng hrang hranga kawngpui sir hmun remchang laia inzuarte thutna tur hmun hi an enkual a, felfai zawk a kalpui dan turte an enho a ni.

AMC Dy. Mayor R. Thanglura chuan, "Vendor te kaihhruaina mumal kan la nei lova, district dangah zawh fel a nih tawh a, Aizawl ah tihfel ve thuai tum a ni a, plan mumal tak siamin vendor te kaihhruaina mumal tak neih thuai kan tum," a ti. Vendor te tan leh mipui tana him lo chin ti bovin, licence nei lo tam tak awm mek tihbo an tum thu a sawi bawk.

November ni khat atang khan AMC hian street vending plan hi kalpuiin district pum puiah Vending Zone leh Restricted Zone siam tur a ni a, Mizoram sawrkarin notification a la chhuah leh dawn a ni.