February 16, 2021 a Aizawl Municipal Corporation (AMC) inthlan neih tur a inbuatsaihna kalpui mekah, inthlan dan bawhchhiatna chungchangah complaint theh luh a la awm lo a, February ni 1 thleng inhnuhdawh hun hawn a ni bawk.

ZALEN zawhna chhangin State election commissioner Laima Chozah chuan AMC inthlan neih turah nimin thleng khan dan bawhchhiatna chungchangah complaint dawn an la nei lo tih sawiin, tluang taka inthlan neih theih SEC chuan a beisei tih a sawi.

Laima Chozah chuan MNF, ZPM leh INC ten ward awm zawng zawng 19 atan candidate 19 theuh an nei tih sawi bawkin, BJP-in ward pakua chuh turin candidate pakua an nei tih a sawi. BJP-in candidate an neihnate chu, ward no. I, III, IV,V,VI,VII,IX,X leh XI te a ni.

SEC ruahmanna siam angin, AMC inthlan chuh tumte tan January 28, 2021 thleng a hming pek luh theih hun hawn-ah MNF, ZPM, INC leh BJP a tangin candidate mi 66 in hming an pe lut a, hming pek luh te hi January 29, 2021 khan endik niin, hnawl an awm lo. Inhnukdawk leh duhte tan February 1 thleng inhnuhdawh na hun hawn a la ni.

AMC inthlanna neih turah hian February 16, Thawhlehni zing dar 7 a tanga tlai dar 4 thleng vote thlak a ni dawn a, vote tlate chu February 18, Ninganiah chhiar a ni ang.