ZALEN April 25, 2025 : Aizawl Municipal Corporation (AMC) chuan dan kalha kawng kama thil zuar thin te, hmun him zawka sawn hna a thawk mek a; naktuk hian Chanmari LC leh Khatla LC huamchhung an survey dawn a, hetihlai hian zanin hian Tuikual South area a thu thin te chuan thut leh ngei tumin hma an la.

Venghlui Local Council leh Tuikual South Local Council huamchhunga kawng kama thil zuara thute chu AMC Multi-Complex Tuikual South ah an thutna hmun buatsaih sak vek an ni a. Chuvangin, Venghlui Local Council leh Tuikual South Local Council huamchhunga kawng kamah street vendor tumah thu lui tawh lo turin AMC chuan hriattirna a chhuah tawh a, heihi khauh taka kenkawh chhunzawm a ni dawn a ni, an ti bawk.

Hetihlai hian AMC Complex Tuikual South a thu te chuan Inrinni-a kawngkama thut leh an tum chhan chu thutna mumal pek an nih loh vang an ti ve thung a, thutna an tiamnaah thutna pe lovin hmun danga thut tir an tum vang niin ZALEN an hrilh ve thung.

AMC chuan a tah tawlin hmalak chhunzawm zel a ni dawn an ti a, he hmalakna hi Aizawl inrelbawlna a felfai zawk nan a hmalakna a ni a; mipuiten eitur tuihnai zawk an lei theih nan te, kawng kama thilzuarte (street vendor) leh a dawrtute himna tur te, kawngpui tawt lutuk tihziaawmna tur te a ni a, chuvangin hmalakna hian Aizawl mipuite thlawp a hlawh hle nia hriat a ni, an ti.