Aizawl; Nimin khan AMC inthlan 2021 tana Congress Party chuan Ward No.XIV Campaign Kick Off, Mission Vengthlang Kawnah an hmangin Zodintluanga CLP Leader chuan AMC tana pawimawh Mizoram State Finance Commission chu din duh loah MNF sawrkar a puh.

Zodintluanga chuan, “MNF sorkar hian AMC chungchanga tha thawhtu leh thahnemngai tak anga a insawi hi a zah thlak hle a, AMC tana pawi mawh Mizoram State Finance Commission pawh a din duh lo a, hei vang hian sum leh paiah AMC leh state-in harsatna a tawh phah a ni,” tiin a sawi.

“Congress sorkarin Mission Vengthlang leh Aizawl veng tam takah infiamna hall sain enkawl zuina pawh veng chhung mite kut ngeiah a hlan vek a. MNF sorkarin heng hi Veng mite kut atanga neitu nihna chhuhsak zawnga a vau chu a zahthlak hle a, Congress sorkara sak Mission Vengthlang Table Tennis Training Centre leh Basketball Court pawh vengchhung kutah kan hlan let leh nghal dawn a ni,” a ti.

CLP leader chuan Election Commission-in inthlan a puan hnuah veng hrang hrangah thuneihna hmang suala chief minister leh a minister ten infiamna hmun tur hmun vote zawnna atana ram an zawng der chu Election Commission Model Code of Conduct Rules bawhchhiatna a nih thu a sawi.

Covid-19 avangin ram pum a buai a, mipuite dinhmun tha lo taka a din laiin petrol leh diesel-ah chhiah thar mipui phurrit an siamsak leh niin a sawi bawk a. Aizawl khawpui leh Mizoram mipuite harsatna sukiang tur hian Congress party-in hma a lak leh tur thu a sawi bawk.