ZALEN March 20, 2025: Vawiin khan ni hnih (2) awh tur Aizawl Municipal Corporation (AMC) Board of Corporators (BoC) meeting chu Lalrinenga Sailo, Aizawl Mayor kaihhruaiin neih tan a ni. BoC Meeting-ah hian kum 2025-2026 atana AMC Budget Estimate pharh a ni a. AMC hmalakna hrang hrang te report ngaihthlak niin Property tax khawnna tura zone revision neih a ni bawk.

Lalringliana, Executive Corporator (Cash & Accounts) chuan Budget Estimate 2025-2026 hi pharhin sawifiahna hun a hmang a, he budget hi tun AMC term tana Budget Estimate an siam tawp ber tur a ni tih sawiin term chhunga a thawhpui Mayor leh Corporator te, AMC official ten thawhhona tha tak an nei chu lawmthu a sawi a ni. 2025-2026 atana AMC Budget Estimate hi cheng vaibelchhe 112.17 niin Lungleia Municipal thar lo piang nen 15th Finance Commission grant insem a lo tul tak avangin kum kalta aiin Rs. 300 lakh in a kiam a. Sawrkar laipui in a beisei angin an thawhchhuah ve liau liau (own source of revenue) erawhin pun lam a pan ve zel thu leh, hei hi thil lawmawm tak a nih thu a tarlang a ni.

Lalringliana hian AMC budget inrelbawl dan chu a tha tiin a sawi a, budget atanga 12.68 % chauh hi Elected Corporators leh thawktute hlawh kaihhnawih atana hman tur a ni. AMC inrawlbelna zawng zawng - Elected Corporators leh thawktute hlawh, Local Council lawmman leh a kaihhnawih, Medical Reimbursement leh Office inrelbawlna hrang hrang a senso turah 20.17% dah a ni a. AMC budget 79.83 % lai hi mipui tana tangkai leh hmasawnna hna (development works) thawhna atana hman a ni dawn a ni.

AMC-in Grant hrang hrang a dawn tur leh Property Tax te a beisei anga a hmuh theih chuan Financial year 2025-2026 chhungin Corporator Ward Development Fund atan Rs. 68 lakh theuh ruahman a ni a. Domestic/Community Water Reservoir (Tui dahkhawlna) scheme leh Solar Rooftop Scheme kalpui thar a ni dawn bawk a ni.

AMC budget atanga 10.25% hi AMC in a thawhchhuah tur a ni a, 67.41% hi 15th Finance Commission grant atanga beisei niin 22.34% hi State sawrkar grant hmuh beisei a ni.

Budget Estimate hi March ni 21, 2025 dar 11:00 AM-ah sawi ho a ni ang a, pawm tum a ni ang.

BoC meeting hian 15th Finance Commission recommendation bawhzuina atan property tax zone a ennawn bawk a, zone rate ti danglam loin veng thenkhat te awmna zone siamthat a ni.