Aizawl July 23, 2024 : Vawiin khan ZPM General Headquarters Office-ah AMC Ward VI by election lo awm tur atan official candidate puanna hun hman a ni a, AMC Ward VI - Chanmari West, Edenthar leh Hunthar Vengte a candidate tur atan ZPM Vice President W. Chhuanawma chuan H. Lalremtluanga, Chanmari West a puang.

AMC By-Election Candidate puan inkhawmah hian ZPM Vice President W. Chhuanawma chuan AMC Corporator atana Candidate thlan danah ZPM Party hruaitute chuan ngaihtuahna nasa tak leh fimkhur taka ram leh khawtlang tana thahnem ngai taka thawk tur an ngaihtuah hnuah lungawi takin H. Lalremtluanga, Chanmari West an ruat thu a puang a, Ward VI huam chhunga mipuite pawhin duhsak taka khawngaihna vote lo pe leh theuh turin a sawm a ni.

H. Lalremtluanga hi H. Biakchhunga leh Lalchungnungi te fapa niin Chanmari West ah an cheng mek a, Zirna lamah BA English a zawh hnuin MSACS hnuaiah Outreach worker hnate, SIPMIU-ah Assistant Programme Dorector hnate leh New Horizon School ah Vice Principal hnate a lo chelh tawh a ni. Rawngbawlna lamah pawh Presbyterian Kohhran Chanmari Bial Zaipawl member a lo ni tawh thin a, Chanmari West Hmar Veng Branch KTP OB hna Kum sawm chhung a chelh tawh a, Bial TKP leader nihna te a lo chelh tawh bawk a ni. Kum 2021 khan Tual Upa atana thlan tlin a ni a, kum 2024 ah Kohhran Upa atana thlan tlin niin he rawngbawlna hi a chelh mek a ni.