Aizawl: Mizoram Pradesh Congress Committee (MPCC) chuan chief minister Zoramthanga chu ramri chungchanga hma la ngam lovah puhin 1875 inner line-a sawrkar dinna chu Amit Shah leh Assam CM la hrilh ngam loah an puh bawk.

Nimina thuchhuah an siamah MPCC chuan tun hnaia kan ramri buaiah hian NEDA-a MNF thawhpui, Assam BJP sorkar hi a bul tantu a ni zar zar tih an sawi a. Assam BJP sorkar hi tun hnai buainaah a bultumtu a ni tih a chiang chung hian MNF sorkar hruaitute atangin Assam BJP sorkar demna tawngkam pakhatmah hriat tur a awm lo va. A tir atanga a tawp thlengin Mizoram Chief Minister Zoramthanga phei chu a ngawi tluan parh a. Prime Minister Narendra Modi, Union Home Minister Amit Shah leh Assam Chief Minister Sonowal hnenah te hian kawngpui dan avanga Mizo mipui harsatna leh ramria Mizoram sorkar dinna, nikum (2019) July 8-a Council of Minister Meeting meuha an pawm, kum 1875 Inner Line chungchang pawh tun thlengin sawi fiahna a lo la nei lo bawk niin an tarlang a ni.

MPCC chuan tun hnaia ramria buaina kan tawh laia Mizoram Home Minister reh lutuk chu ngaihthat thlak loin an hria a. Ramri depa chengte thlamuan tura pen khat pawh a pen lo chu Mizo mipuite tan a beidawnthlak an tih thu sawiin December 15, 2018-a minister atana lawm luh a nih tuma a incheina, Mizo mipuiin kan mitthlaa kan la hmuh laia ramri depa harsatna kan tawh laia a bibo daih chu Mizo mipuite tan hriatthiam a har hle niin an sawi.