ZALEN March 17, 2025 : BJP Mizoram President Vanlalhmuaka chuan vawiin khan thu thar thehdarhtute a hmachhawn naah Bru vanga buaina leh AR sawnchhuah an nih theihna atana hmalatu Union Home Minister Amit Shah lakah Mizo mipuiten lawmthu sawi an ba niin a sawi.

Vanlalhmuaka chuan Union Home Minister hian Minister a nih hlim atangin Mizoram tan hma nasa takin a la a ti a, Bru buaina min chinfel sak hnuah Assam ramri buai avanga harsatna kan tawh thin lakah hma nasa takin a lak avangin tunah chuan buaina pawhin min kiansan tawh a ti.

BJP Mizoram President chuan 1987 atanga Assam Rifles sawnchhuah tuma sawrkarna changtu apiang hma lakna chu ropui a tih thu a sawi a, Aizawl khawpui chhung atanga AR te sawnchhuah an nih theihna nan hian Amit Shah chu hmalatu langsar ber a ni, tun dinhmun kan thlen theihna atan hian ani tluka thawhhlawk an awm lo a ti.

Lengpui Airport chungchangah pawh Amit Shah chu Chief Minister Lalduhoma chu Airport Authority of India (AAI) dawr tura thurawn petu a ni a ti a, Mipui ten Indian Air Force (IAF) kuta Airport hlan an duh lo tih a hriat avangin AAI hi be turin thu a rawn a, Union Home Minister Amit Shah hian thla 6 chhungin Airport Authority of India in Lengpui Airport tih chang tlung hna a thawk nghal dawn tih NGO Coordination Committee a lo hrilh te hi a lawmawm a ni, a ti.