Aizawl November 21, 2022 : MNF Vice President Lalthlengliana chuan, tunhnaiah Congress-in an ngum khak hmu lovin sum harsatna chungchangah an bei niin a sawi a. An hunlai khan sawrkarin sum a neih loh avangin Treasury vawi 30 chuang an khar, a ti.

Mizo Hnam Run inkhawma thusawitu Lalthlengliana chuan Congress hunlaia finance dinhmun chungchang sawiin, "Sum an harsat avangin kum 2012-2015 chhung khan RBI atangin Rs Vbc 1331.61 lai an puk a. CM Pu Hawla khan a khat tawkin “RBI-a kan sum dinhmunin a sen a kawk reng” a ti reng a nih kha. Finance thiam intite khan tuna an president Pu Lalsawta hi Finance Minister a nih lai khan SSA sum Rs Vbc 70, sikul naupang uniform leina tur an ti-lapse a. Tin, Congress sawrkar khan MNF sawrkar thar hi leiba Rs. Vbc 7300 chuang min hnutchhhiah," a ti.

"NLUP atan PM Special Package kan sem ang an ti a. PM Special Package a awm si lo a. State Plan Fund an hman avangin CSS cheng vaibelchhe tam tak matching share an pek theih loh avangin a kir phah a. CAG-in NLUP a audit report May 25, 2017-ah Mizoram Assembly-ah pharhah, sawrkar flagship program – NLUP thiltum a hlawhchham, tih a nih kha," a ti.

ZMC chungchang sawiin MNF Vice President chuan, "Zoram Medical College (ZMC) dinna tur khan MNF sawrkarin building 51 bakah infrastructure lian tham zawng zawng a sa a. Congress sawrkar khan ZMC-a thawktu, damlo leh zirlaite hman tur building 10 pawh a sa tling lo. Heti chung hian ZMC hi an kutchhuak ang hialin an sawi," a ti. "MNF Sawrkar khan AR Lammuala sakna tur RG Stadium (Rs Vbc 20) lung a phum a, Congress khan Mualpuiah an suan a. Hawla Indoor Stadium tih hming an puttirte hi MNF sum sih chhuahsa tho a ni," a ti.

CM Zoramthanga hmalakna sawiin, "Pu Zoramthanga tluka finance enkawl thiam Mizoramah an la awm lo. Kum 1998 khan Congress sawrkarin cheng vaibelchhe tam tak leiba min hnutchhiah chungin bul a tan a. PM Vajpayee hnenah Peace Bonus Rs Vbc 182.45 chu a dil chhuak a. Baffacos-ah vaibelchhe tam tak sawi chhuakin awm lo a ta a ma remhriatnain bul a tan a. MNF sawrkar hmasa chhung khan Treasury khar a awm ve lo. Mautam tam lai pawhin a thlawna buhfai semtu a ni," a ti.

MNF sawrkar hmasaa development lian tham sawiin, New Capital, Bawngkawn to Leitan kawng zauh, Millenium Centre, Ch. Saprawnga Truck Terminal, Ch. Chhunga Bus Terminal, Aizawl to Lunglei (World Bank Road). Chaltlanga Lalsawia Bus Terminal leh Aizawl Municipal Council a din bakah PMGSY hnuaiah thingtlang khua zawng zawng inkalpawhna kawngpui a lai chhuak vek, a ti.

"Pu Zoramthanga kaihhruai sawrkar khan SSA leh RMSA bul a tan a. Police Deptt-ah post thar 3197 lain, Batallion 4 a din a. PWD, PHE leh P&E-ah E-in-C post thar a siam a. District thar 5 chu fuke kimin a siam a, Aizawl khawpui tan GAWS Phase-II a siam a, Mizoram University a din bawk," Thlenga chuan a ti a. "Heti chung hian Chief Minister Pu Zoramthanga, finance enkawl thiam lo anga Congress-ten an puh hi Tlawng vauka Mat dap an sawi ang chauh a ni," a ti.

"MNF a lo sawrkar khan hripuiin min nuai a, Congress sawrkar leiba hnutchhiah Rs Vbc 7300 chuang nen hripui kan hmachhawn a. Heti chung hian ei leh barah harsatna lian tak kan tawk lo. MNF sawrkar hlim khan District thar 3 chu a taka function-tir a ni. Congress kum 10 sawrkara kawng chhe lutuk chu MNF sawrkar tirhah siamthat vek a ni a. District tam takah phullem phah a ni a. Kan CM zahawm tak hian tun term tharah pawh Bamboo Link Road atan Cheng Vbc 100, Special Assistance Cheng Vbc 400, tunhnai maiah MoRTH atangin kawng thar tur leh a chhe siam nan Cheng Vbc 6664 lai sawi chhuah a ni bawk," Thlenga chuan a ti bawk.