ZALEN, June 07, 2025: Youth Icon 2024-in Inrinni zana LPS Studio atanga tun hnaia khuarel chhiatna tawkte tana charity concert an neih tur chu an zaithiampui leh mi lar dangten an thlawp a, social media kaltlangin an thiante concert tur lo thlira vehbur an khawnah tanpuina thil pek pe turin mipui an sawm.

Mizo footballer lar, Lallianzuala (Lza) Chhangte chuan Instagram-ah Icon top 10-ten charirty concert an neih tur a thlawpzia tar langin a story-ah, “Tam lua awm lo, tlem lua awm lo, mi dangte tan malsawmna lo ni ve ngei ang che,” tiin a tar lang.

Icon star-te thian hnai tak, zaithiam, Zothana pawhin a IG story-ah video clip tichhuakin a thiante leh a u-ten LPS Studio atanga concert an neih tur chu lo thlirsaka chhiatna tuarte tanpuina lo pe ve theuh turin mipui a sawmna thu a sawi.

Zaithiam dang - Israela Pachuau, Jonathan Lianhna leh mi lar dangte pawhin an IG story-ah Youth Icon star-ten concert an neih tur hi an thlawpzia an lantir hlawm bawk.

Concert hi LPS Studio atangin zan dar 08:00-ah tan a ni ang a, LPS 1-ah leh LPS YouTube Channel-ah live-in pek chhuah a ni ang.

Hun hman chhung hian tanpui ngaite pui duh tan mipuite luan chhuahna hun siam a ni dawn a, sum pek/thunna tur QR code leh phone number-te tar chhuah a ni dawn a ni.

Youth Icon 2024 Top 10-te chuan Mizoramah leilung chhiatna tak a thlen avanga nunna chân, in leh lo chân, in rauhsan ngai an awmte chu pawi an tiin an lainat hle a; harsatna tawk mekte tana an tih theih ve tawk tiin vehbur khawnna hun an hman tur hi chhim vek tur leh an phal ang tawka tanpui ngaite tana luang chhuak turin mipui an sawm.