Aizawl September 7, 2022: Food Civil Supply & Consumer Affairs (FCS&CA) Department chuan Buhfai hrisel zawk (Fortified Rice) sem chhuah chhunzawm leh a nih dan tur leh April 1, 2023 atangin Mizoram pumah AAY leh PHH card nei te ration-ah pek an nih tawh tur thu an thuchhuah siam-ah an tarlang. 

FCS&CA Department chuan central sawrkar duh danin Aspiration District hnuaia Mid-Day-Meal leh ICDS programme hnuaia zirlai naupangte hnenah fortified rice hi nikum lam atang khan Mamit district ah sem chhuah tawh thu leh Mid-Day-Meal (PM Poshan) leh WBNP programme hnuaiah rampum huapa fortified rice hi pek a ni tawh, an ti.

FCS&CA hian July, 2022 atang khan NFSA 2013 hnuaia AAY leh PHH beneficiary te hnenah fortified rice hi thlatin ration atan aspirational district (Mamit District) hnuaiah an pe tawh a ni. FCS&CA thuchhuak chuan, "Central ruahmanna angin April 1, 2023 atang hian ram pumah fortified rice hi AAY leh PHH beneficiary te hnenah thlatin ration-ah pek a ni tawh ang," a ti.

FCS&CA thuchhuak chuan, "Fortified rice hi buhfai hersawmah nutrients leh vitamin te telha buhfai ang taka a bik a siam a ni a, buhfai pangngai-ah 1% zel telh/pawlh a ni a (buhfai Kg 50 bag-ah Kg. 0.5 pawlh a ni), hei hi mipui ten an chian loh avangin plastic rice etc. emaw ni a ngaihna te pawh awm thei. Chuvangin fortified rice nihna hi kan hriatchian a ngai a ni," an ti.

Fortified Rice hi chaw (buh) hrisel zawk, micronutrients (Iron, Folic acid leh Vitamin B12)  tam na ni. Naupang leh Nu naupai ten an taksa mamawh ang chakna an hmuh theihna atana siam niin,  Thisen tlakchhamna (anemia) laka vengtu a ni bawk.

FORTIFIED RICE DANGLAMNA: (NUTRITIONAL CONTENT)

Normal Rice (per 100 grams) = Iron - 0.7 mg / Folic Acid - 8.0 ug / Vitamin B12 -0
Fortified Rice (per 100 grams) = Iron - 28-42.5 mg / Folic Acid - 75-125ug / Vitamin B12-0.75-1.25 ug

Iron: Iron hi kan taksa peng hrang hranga boruak tha pe tu thisen (hemoglobin) siamtu pawimawh ber a ni a. Taksa ti lumtu leh than nana pawimawh a ni bawk.
Folic Acid: Folic acid hi nu naupai tan a pawimawh a, naute hrisel taka a lo pian theih nan leh thluak than nan a tangkai. Lung tan chaw tha tak a ni bawk.
Shelf life: Fortified rice hi thla 12 chhung a dah that theih a ni.

Buh sil dan: Buh reng reng sil laiin nuai nawk nawk tur a nilo. Buh kan sil tur chimin tui kan leih anga, kan kut chu tuiah chiahin kan ti vir ang. Hei hian buh a chakna tarn tak tuia luang chhuak tur a veng thei a ni.