Aizawl: Assam Rifles mi leh sa thenkhatin Vairengte check gate an paltlang luih chungchanga Mizo mipui hnena ngaihdam dil tura an phut angin nimin khan AR chuan Central YMA ah ngaihdam dilna an thlen.

Central YMA hruaitute hnen atanga Zalen thudawn danin Assam Rifles te hian nimin chhun dar 12:50 khan Central YMA-ah ngaihdam dilna hi an thlen a ni. AR hi an thiltih avang hian August thla ral hma ngeia ngaihdam dil turin CYMA chuan a lo ngen tawh a. August 26,2020 (Nilaini) khan Central YMA Office-ah 23 Sector Commander, Assam Rifles Brigadier leh a hote 3 chu lengin, tawngka a ngaihdam an dilna leh Director General, Assam Rifles a lo kal dawn avanga September 5,2020 (Inrinni) thleng ngaichang turin an lo ngen tawh a ni.

Central YMA chuan nimin Teachers’ Day lo thleng pual hian tlang hrang hranga zirtirtute duhsakna chibai an buk a. ‘Raltiang ram thleng tura min kaihruaitu zirtirtute, kan ram leh hnam tana thahnemngaitaka in hnate thawk chhun zawm zel turin kan ngen a che u,’ an ti. Saizawh ‘W’ hmuna Mizo pawisawilo te, Takam hoten kut an thlak chu Central YMA chuan a dem tak zet tih sawiin pawisawi lo kutthlaktute chu dan anga hremna a na thei ang ber pe turin sawrkar an phut tih an sawi bawk.