ZALEN March 12, 2025 : Home Minister hlui Lalchamliana, MNF NCC Member chuan Assembly Budget Session neih mekah ni 10.3.2025 khan Chief Minister Lalduhoma chuan Assam Riffles te Aizawl khawpui laili atanga sawn chhuak tura sawrkar hmasa hunlaia hmalakna kallaiah 'Home Dept nena MOA (Memorandum of Agreement) an lo siam kha keini chuan pawm tlakah kan ngai lo a, a tharin kan siam' tih a sawi kha thu dik famkim lo, politics tha lo tak hmanga sawrkar hmasa beihna a ni, a ti.

Lalchamliana chuan, "Ngaihtuahna fim tak leh rim taka MoA lo buaipuitu Home Dept. official te thlenga tih mualpho tumna tha lo tak a ni a. Thu dik famkim lo CM in a sawi leh mai thin hi a vanduaithlak hle. Chief Minister hian 'MOA hmasaah kha chuan Quarter Guard leh a chung tlang zawng zawngte pawh hi an la retain tur a la ni vek a ni. Chung zawng zawng chu keini chuan kan chhuahtir vek a ni. Chuvang chuan a hmasa kha chu keini chuan pawm tlakah kan ngai lova," tiin a sawi.

HOme Minister hlui chuan, "MOA hmasa kha fimkhur leh uluk takin, sawrkar dan engkim zawm chungin duan a ni a, Assam Rifles lamin ram luah zui beisei an rawn neihte pawh Mizoram sawrkarin a remtih loh dan leh AR ten an chhuahsan ngei a tul chhante pawh sawrkar dan ang thlapin, felfai taka chhanlet nghal vek a ni. Hetiang hi thil awmdan anih laia sawrkar hmasain MOU a lo duanah Quarter Guard leh a chhak lam tlangte pawh AR te luah chhun zawmtir zel tura lo remti fel vek ang maia CM-in Assembly House meuha a sawi chhuak duh hi a vanduaithlak hle a ni," a ti.

"Thudik karah mipui awih theih tura thudik tawklo hmanga sawi belh zauh ching Chief Minister kan nei hi a pawi hle a. Kan ram hotulu ber thil chin than hi kan ram hmel tibaltu nithei a ni a. Ama sawi ngei midang sawia puh tlat a chin thinte pawh hi sim thei se a duhawm takzet. AR insawnna tur thu kal mekah pawh hian kan CM thusawi hi mipui ten ngaihdan tawk kan hriatthiam a tul hle a ni," a ti bawk.