ZALEN March 18, 2025 : Deputy Chief Minister hlui Tawnluia chuan, AR insawnna tura hnathawh tur 90% vel Laldenga leh Zoramthanga'n an tifel vek a. ZPM hian an hotute thawh fel sa a hmawr an rawn bawk mai a ni. An mahniin kum 1 chhung leka an thawh anga sawi hi a dik lo. ZPM hian Zokhawsangah sawn bawngtuthlawh cheh khat pawh an chek lo, a ti.

Melriat MNF Unit ten Melriat VC election-a an 'solid' lawmna hun BNRGSK Hall-a an neih-ah hian MNF National Core Committee Tawnluia chuan, "AR insawn theih nan Pu Laldenga'n theih tawp a chhuah a, an insawnna tur Zokhawsang ram a ti fel. Pu Zoramthanga'n an camp tur zawng zawng a sa a, an tui lakna te, electric te, an mamawh kawngpui bakah vaibelchhe tam tak man thil hrang hrang a tifel vek bawk."

"Kum 2019 khan AR an insawnna tur thu Home Ministry-in an tifel tawh a, kum 2020-ah insawn tur an tifel nawn leh. An chhuahsan ram pawh mipui tan tiin MNF sawrkar khan Assembly-ah dan kan siam vek tawh bawk a. Zokhawsang pawh Amit Shah chuan a rawn hawng a nih kha. MOA chungchangah kan inbe mek a, kan hun a liam a, tunah tihfel a ni ta hi kan lawm a ni," a ti.

Tawnluia chuan, "Miin ZPM chu enchhin an chak a, an enchhin a, an hrechiang tawh. Enchhin an dawl loh zia an hre tawh," a ti a. "Nationalism-ah he sawrkar hi a hnung tawlh nasa hle a, a tlanchhe nasa hle. Inthlan lehah hian Nationalist sawrkar a ding leh dawn a ni," a ti bawk.

MNF Vice President hlui chuan Melriat-in MNF VC an solid thei chu lawmawm a tih thu a sawi a. Khawtlang tana an beihna kawngah, kan lo thlang dik mang e, an tih turin hna thawk turin a fuih a. Dikna leh rinawmna nen khawtlang hruai turin a chah a. Sawrkar an dawrna kawngah pawh MNF VC-in in dawr dawn a ni lo a, Melriat khawtlang aiawh in ni a, inthlahrung lova sawrkar dawr thin turin a chah bawk a ni.