ZALEN, Mar. 26, 2025: Tun hnaia Aizawl khawpui laili atanga Zokhawsanga Assam Rifles (AR) insawn chhuah chungchangah Mizoram Pradesh Congress Committee Gen. Secretary Lalbiakzama chuan tha thawh ve miah lo anga chief minister-in ram rorelna ina a sawi chu chhangin an tel ngei thu a sawi.

“Chief Minister Pu Lalduhawma khan house chhungah meuh AR sawn chhuah chungchangah Congress sawrkar khan tha thawh ve lem lo ang khan a rawn sawi a. Khang hunlai kha sorkar hna kan la thawh ve lai a ni a, vawi hnih/khat chempui kan lo vai ve tawh dan han sawite pawh a tha ve-in kan hria,” tiin Nilaini khan Aizawl Press Club-a thuthar lakhawmtute hnenah a sawi.

Mizoram sawrkara home secretary lo ni tawh thin, Bza chuan Aizawl atanga AR sawn chhuah hi kum 1987 daih tawha Mizoram sawrkar nawrna avanga Prime Minister Rajiv Gandhi-a’n a lo tiam tawh a nih thu leh Zokhawsang ram pawh ruahman fel nghal a nih thu a sawi.

Congress general secretary chuan AR sawn chhuahna tura hma laknate tar langin, “A thu chuan sawn chhuah chungchang hi home department-ah kum 2005 daih tawh khan pek a ni tawh a. A taka hma kan lak tan kha ‘kum 2015 vel atangin a ni’ ti ila a sual lo vang,” a ti.

October 10, 2013 khan khatih laia kan revenue minister, J.H Rothuama hovin Advisory Committee on Use of Assam Rifle’s Land pawh an lo thut tawh thu leh hetah hian home department an la tel loh thu a sawi bawk.

Home department-a Renu Sharma-i principal secretary a nih khan AR leh Zokhawsanga an hmun tur buatsaihtu, Engineering Project India Limited (EPIL) nen November 8, 2016-a an thutkhawmah AR hian dan tlawhchhanin an ram luah chu an ta a nia an sawi pawh home department hian law department hnena zir tura thlenin anni hian ‘ram neitu an nih theihna tur a awm lo’ tia an chhan thu a sawi.

Mizoram sawrkarin a tanchhan thin chu S. Barkataki, Deputy Commisioner, Lushai Hills thupek, June 28, 1952-a AR luah chin tur ram sawi fiahna leh Standing Order No. II Of 1952, August 8, 1952 Assam Gazette-a chhuahte a nih thu Bza chuan sawiin, “Tun thleng hian hemi luahlantu thupek a la awm leh lo. Hetianga kan han inchin chhuah hnu chuan AR hotute khan sawi tur leh tanchhan tur an vân sawt khawp mai,” a ti.

Sharma-i hova an thutkhawm zui zelah AR tanhmun an phehsak zel nia sawiin Memorundum of Understanding (MoU) draft an thehluha an luah zawm tura an tih - quarter guard leh a chhehvel, Loch House te pawh an hnial niin home secretary hlui chuan a sawi.

Tuna Congress party Sr. vice president ni mek, Lalnunmawia Chuaungo hi home department-a principal secretary a nih hnuah an bawhzui chak lehzual niin Bza chuan a sawi a, “Zokhawsang hmunte tlawhin EPIL hotute kan tur a, AR hotute pawh an hmun tur a nih angin vil nguna EPIL pawh nawr ve turin kan ti thin,” a ti.

Bza’n a sawi dan chuan Nunmawia khan Khatla atang pawha nawr chhuah tha a tih angin Sector Office, Khatla sawn chhuahna tur hmun pawh revenue hotute nen Zokhawsang khaw hlui hmun leh tuna tlak lama family qtrs an sakna hmar lama mual pawh a hova an en thu a sawi.

Nunmawia ho bawk hian Zemabawka lo neituten AR laka harsatna an tawh loh nan tiin Zokhawsang tlak lama AR ram pawnah zel kalin bypass kawng laihsak tura hmalak a ni tih a sawi bawk a, “Formation cutting chu an zo hman ti tih tawh,” a ti.

PWD, P&E leh PHE hotute pawhin tan lain AR mamawh tur an tihsak vek tawh a, sawi nawi leh sel tur an dap ngar ngar niin a sawi.

Heng hunlaia Bru Repatriation buaipui a lo kal thin, Styandra Garg, Jt. Secy, hmarchhak bialtu pawh a remchangah an lo sawipui thin tih a sawi bawk.

MHA leh EPIL-ho an nawr lai leh Mizoram sawrkar pawh an tih tur chinah an inpeih tawh hle hnu, kum 2018 kumtawpah sorkar a inthlak a. MNF sorkar thar hnuaiah February 7, 2019-ah MHA-in meeting a kovah Mizoram sawrkar aiawha a kal thu leh hetah hian May 31 hmaa insawn chhuak tura thutlukna a siam thu a sawi.

“A tira thupek siamtu leh an insawnna tur zawng zawng lo buatsaiha lo peihtute engmah ti ve lo ang a kan chief minister-in a sawi mai hi chu a duhthawh ve deuh em aw…?” a ti.