Aizawl lailai atanga Assam Rifles te chhuak hnai: Inremna MoA ziahfel a ni

ZALEN Oct. 26, 2024; CM Lalduhoma'n Aizawl khawpui laili atanga Assam Rifles sawnchhuahna tur chungchangah Assam Rifles te nen New Delhi-ah Memorandum of Agreement (MoA) October ni 23, 2024 -ah sign a nih thu a sawi.

Vawiin tlaia CM conference hall a thuthar thehdarhtute a kawmna ah he thu hi sawiin, CM chuan Aizawl khawpui laili atanga AR te insawnchhuahna turah unofficial-in inbiakna kalpui reng a ni tih a sawi a, AR te nena inremna an ziah chu April ni 1, 2025 atanga hman tan tur a nih thu a sawi.

CM chuan AR te insawnna tur Zokhawsangah hmalakna tur a la tam tih a sawi a. Inremna an ziah angin April ni 1, 2025 ral hma leh ral hnu AR te chhuah dan tur pawh ruahman a ni tih a sawi.

MoA ziah dan :

Inremna angin heng hmun pahnihte hi AR ten an la luah chhunzawm ang.

1. HQ 23 Sector/Mizoram range : 95.88 acres tuma HQ 23 Sector/Mizoram range, AR in an luah mek, Khatla.

2. DIG Residemce : 0.850 acresna zau Raj Bhavan Complex sira ram, Commander of Assam Rifles in chenna atana a hman mek.

Inremna an ziah atanga chhiara thla thum chhungin AR ten heng ram leh building te hi sawrkar hnenah an hlan ang.

1. Chite River (Dhobi Nallah) : 62.8 acres

2. Church area leh Assam Rifles Church : 0.63 acres

3. Babutlang ram leh an bungrua : 0.453 acres

Academic session kal mek zawh fel hnu, nakkum April 2025 ral hmain heng a hnuaia ramte hi AR ten Mizoram sawrkarah an hlan fel leh vek ang.

1. Lammual leh a chhehvel ram 25.94 acres : Main barrack complex te, Unit hospital te leh AR ground te.

2. Land & Building :1.1 acres a zau Loch House

3. Quarter Guard Hill Complex : 14.5 acres aa zau quarter guard hill leh a building te.

4. School area : 1:00 acre a zau school area leh a building te.

5. War Memorial & Mandir : 0.78 aces a zau.

Mizoram sawrkar chuan AR te building luahlai, inremna anga hlan tur te hi a man (depreciated cost) April 2025 ral hmain AR a pe ang. Heng AR in Mizoram sawrkar hnena a hlan ram leh building te hi Mizoram (Restriction on Use of Transfered Land) Act, 2022 sawi angin mipuite tana hman tur a ni.

Heng bakah hian thil pawimawh dang engemawzat MoA ah hian tarlan a ni.