Arsenal chuan Germany forward Kai Havertz chu Chelsea atangin £ maktduai 65-in an lei chhuak ta.

Kum 24 mi hian kum thum liam taa Bayer Leverkusen atanga £ maktduai 71-a Blues a zawm hnuah Emirates Stadium lam hi ‘kum rei tak’ awm turin a pan leh ta a ni.

Season liam taa London khawthlang lam club tana goal kua thuntu, Havertz-a man hi tuna an inpek bakah hian kalpui dang (add-on) nei zel tura inrem a ni.

Havertz hian Premier League-a Chelsea tana vawi 91 a inlan tawhah goal 19 a thun tawh a, heng zingah hian 2021 Champions League final-a Manchester City an hnehna goal pawh a tel.

Mikel Arteta-a’n season ruk zet Champions League-a an inlan phak loh hnuah a khelhpui leh dawn tak avangin Arsenal squad tihchak a tum meknaah German forward hi London-a an thenawm hnen atangina chhuhsak a ni.

Social media-ah Havertz hian Chelsea tantute thlahin ‘thinlung takin’ an chungah a lawm tih a sawi.

“Min thlawpna zawng zawngah ka lawm tak zet a, kan suangtuah thin Champions League-ah pawh nangni nen kan la a ni,” a ti.

A insawn dawn tih puan a nih hnuah Arsenal website hnenah Havertz hian a tum chu a club thar nena ‘nomawi lak’ a nih thu a sawi bawk.

“Hetiang club ka zawm thei leh Arsenal chhungkaw mi ka ni thei hi ka phur hle a ni,” a ti a. “He club hian chanchin pui tak a nei a, thil tam takah kan hlawhtlin theih ka beisei.

“Arsenal squad rilru puthmang hi a sang a, chu chu i hre thei ang. Hei hi tun hnaia Arsenal hmachhawn an harsat em em chhan pawh a ni.

“Nomawi lak kan tum a, chumi tur chuan min tantute leh he club-a mi zawng zawngte tan hian ka theihtawp ka chhuah ang a. Pre-season atana player leh staff-te an lo kira hmuh hlan ka nghakhlel tawh hle a ni,” a ti.

Arsenal hian a vawi thum nan £ maktduai 105 kengin West Ham leh England midfielder Declan Rice lei tumin an thawk chhuak leh mek bawk.

Chelsea hian an squad tihtlem deuh an tum a, Croatia midfielder Mateo Kovacic chu Thawhlehni khan Manchester City-ah an hralh fel tawh a, midfielder Ruben Loftus-Cheek pawhin AC Milan a zawm fel tep bawk.

N’Golo Kante chuan Saudi Arabian team zawm tumin engkim a tifel tawh a, goalkeeper Edouard Mendy leh defender Kalidou Koulibaly te pawhin Saudi Pro League-ah Al-Ahli an zawm fel tawh bawk.

Midfielder Tiemoue Bakayoko chuan a hmain man awm lo turin club a lo chhuahsan fel tawh.

Chelsea neitu tharte chuan an player zinga kum hnih chauh Stamford Bridge-a hun nei tawh, ziah belh tum lo leh ziah belh tura an dawr loh lem lohte chu chhuahtir an duh a. Havertz-a pawh hi kum 2025-ah a contract neih a hmang zo dawn a, pawhsei an tum lem lo a ni.