Aizawl, June 12, 2022 ; Cabinet Minister of Fisheries, Animal Husbandry and Dairying Parshottam Khondabhai Rupala chuan ASF vaccine rampawn atanga a ngaihven sak tur thu a sawi.

Union Minister hian nimin khan Mizoram rawn tlawhin, Taxation Deparment Auditorium-ah AH & Veterinary Minister Dr. Beichhua leh Fisheries Minister K.Lalrinliana ten lo dawngsawngin, Lok Sabha MP C.Lalrosanga leh Rajya Sabha MP R. Vanlalvena ten an tawiawm a ni.

Union Minister chuan sawrkar laipui hmalakna hrang hrang dawngtu (beneficiaries) ten Mizoram sawrkar atanga harsatna an dawng lo tih a hriatin lawmthu a sawi a. India sawrkar chu mi rethei te tana thawk niin, mi retheite chawikan nan scheme hrang hrang siamin, cheng nuai 5 thleng dawn theihna scheme pawh India sawrkar chuan a siam a ni, a ti a. Sawrkar hmalakna sawiin, "Covid-19 avanga ram a buai lai pawhin mi harsa zawk ten ration a thlawn a an dawn theihna siamsak a ni a. Covid-19 vaccine a thlawnin a pe vek thei a, kan ram mipui te chauh nilo, ramdangah pawh a thawn chhuakin, ram dang tan pawh India chu a tangkai em em a ni," a ti bawk. Minister chuan Mizoram in ASF avanga harsatna an tawh te sut kian nan AH & Vety College, Selesih chuan laboratory tha a neih a ngai tih a sawi bawk.

Deputy Commissioner, Aizawl District hnen atangin sawrkar scheme hrang hrang kaltlanga hmasawnna rahbi dawng (beneficiaries) ten eizawnna bul an tan dan te, hlawhtlinna an neih chungchang ngaihthlak leh presentation neih a ni a. AH & Veterinary Department atangin ASF-in Mizoram a nuai dan leh vawk vulh tam takin harsatna an tawh te ngaihthlak a nih bakah National Animal Disease Control Programme, Kissan Credit Card leh National Livestock Programme hnuaia hmalakna te leh adangte ngaihthlak a ni a. Fisheries Department atangin Blue Revolution Scheme, PMMSY leh scheme dang te atanga fish farmers ten hlawhtlinna an neih te ngaihthlak a ni bawk a ni.