Aizawl July 26, 2022 : African Swine Fever (ASF) leng darh zel tur venna tura AH&Vety Department-in vawk an suat sak te tana zangnadawmna chu AH&Vety Minister Dr K. Beichhua'n a sem a. chhungkaw 2488 hnena zangnadawmna an pek hi Rs 10,48,42,200 a ni a, an bank acount-ah Direct Benefit Transfer-a pek an ni.

Vety Polyclinic Hospital Conference Hall, Khatla ah kum 2021 chhunga ASF avanga vawk an suat sakte tana zangnadawmna an pekna hunah hian Dr K.Beichhua chuan, African Swine Fever (ASF) dona kawnga hmalakna leh zangnadawmna (compensation) hmuh a nih theihna tura hma lakna a theitawp chhuahtute chungah lawmthu a sawi a, March 21, 2021-a Lungsen-a vawk thih dan rinhlelhawm report an dawn veleh rang takin an bawhzui nghal tih sawiin amah ngei pawh March 8, 2021 khan Vety daktawr leh mithiamte nen Lungsen khua panin a riahchilh tih a sawi a, ASF darh zel tur khuahkhirh turin hma an la nghal a, an rin aiin a lo darh zau hman hle tih sawiin ASF hri kai hi 100% an thi tia sawi pawh a lo dik hle, a ti

Dr Beichhua chuan ASF vanga vawk thi zawng zawngte zangnadawmna pek kan duh laiin sawrkar laipuiin inkaihruaina a lo neih sa ang baka kal a theih si loh avangin AH&Vety department hriatpuina a vawk suatte chauh zangnadawmna kan pe thei a ni, a ti a. Hemi atana sawrkar laipui leh state sawrkar sum thawh tur hi 50-50 a nih vangin mipuite manganna hriatpuia state sawrkarin a do letna tur sum petu Chief Minister Zoramthanga chungah lawmthu a sawi bawk a, ASF hri kai vawk thi te zangnadawmna tur pawh planning department kaltlangin an bawhzui tih a sawi a, Chief Minister Zoramthanga’n Prime Minister Narendra Modi hnenah PM’s Special Package anga pe turin lehkha a thawn thu a sawi bawk a ni.

National Action Plan hnuaia ASF nuaibo (eradicate) na atana hmalakna lian tak dang chu CULLING (vawk suat) hi a ni a. Infected area chhunga mi zawng chu hri la kai lo pawh suat vek tur a ni. Mizoramah pawh hei hi a theih ang chin chinah kal pui a ni a. Vawk neitu te remtihna la hmasa vekin CULLING hi kalpui a ni. Culling atan hian hetiang hian Government of India chuan compensation pek theih dan ruahmanna a siam a ni.

Vawk kg 15 hnuai lam tan Rs. 2200, kg 15-40 tan Rs. 5800, kg 40-70 tan Rs. 8400, kg 70-100 tan Rs. 12000, kg 100 chunglam tan Rs. 15000 a ni a. Vawk chaw an lo dahkhawl pawh tihchhiat vek tur a nih av angin vawk chaw kg 1 zelah Rs. 22 ruahman a ni bawk.

Tun tumah hian Aizawl district atang mi 1058 in an dawng a, Lunglei - 220, Hnahthial - 140, Saitual - 56, Siaha - 50, Serchhip - 744 leh Mamit - 220 te hnenah pek an ni. Aizawl district chhunga vawt suat sak te sum dawng zat belhkhawm chu Rs. 40068200 niin, LUNGLEI - Rs.7837400, HNAHTHIAL - Rs.3521000, SAITUAL - Rs.1531200, SIAHA - Rs.1251800, SERCHHIP - Rs.25553400, MAMIT - Rs.28079200 niin,  a vaiin Rs.104842200 pekchhuah a ni.