ZALEN August 4, 2025 : Mizoram Larsap, General (Dr) Vijay Kumar Singh chuan vawiin khan A.H& Vety. Department Secretary Lalsangliana leh hotu dangte chu Raj Bhavan-ah kawmin, vawk pul hri African Swine Fever (ASF) chungchanga Mizoram dinhmun bakah department hmalakna leh hmachhawp tlangpuite a sawipui. He hunah hian ASF avangin cheng vaibelchhe 982.16 hu vel chan a ni tawh thu report a ni.

Dr. Esther Lalzoliani, Dy. Director (DI&E) chuan PowerPoint Presentation hmangin ASF chungchang, Mizoram dinhmun leh pawimawh hrang hrangte a sawifiah a. Tarlan a nih danin March ni 21, 2021 khan Lungsen khuaah Mizorama African Swine Fever (ASF) case hmasa ber report a ni a. Nimin August ni 3, 2025 thleng khan ASF avanga vawk thi zat 69,411 awmin, hrileng darh zel tur ven nana suat (culled) 52,194 a awm a. 

Chhungkua 11,424 te nghawngin, cheng vaibelchhe 982.16 hu vel chan tawh anga chhut a ni a. Sawrkar laipui Assistant to State for Control of Animal Disease leh State Sawrkar kaltlangin vawk suat compensation cheng nuai 1451.915 sem chhuah tawh a ni a, heng bakah hian Mizoram DM&R Department kaltlangin vawk thi compensation cheng nuai 477.08 pek chhuah a ni tawh tih a tarlang.