Aizawl: Vawk natna hlauhawm tak African Swine Fever (ASF) vanga Mizoram vawk thi chu 29,000 dawn an tling tawh a, hetih lai hian vawk hri leng chuan ziaawm lam a pan hret hret thung.

ZALEN-in AH&Vety department thawktute hnen atanga thu a dawn danin ASF vanga vawk thi hi a ni telin an tlem hret hret niin an sawi a. “Vawk vulhna hmun lian deuh a luhchhuah kha a ziaawm deuh tawh niin kan hria a, tun dinhmunah chuan kan ziaawm chho hret niin kan hria a ni,” an ti. Vawk thi zangnadawmna pek chung changah AH&Vety thawktute chuan, "Vawk neitute hnena compensation pek chungchangah hian sawrkar laipui nen kan inbe reng a; mahse, sanction erawh kan la hmu thei lo a ni,” an ti.

State dang atanga vawk lakluh chu phal a la ni lo tih sawiin, “Hri leng ziaawm deuh hnuah thla ruk vel nghah phawt tha kan ti a, hemi hnuah hi chuan vawk lak luh dan tur department-in a ngaihtuah dawn a ni,” an ti a. Vawk lakluh chu phal loh reng pawh a remchang lo niin an sawi. Mizorama ASF luh chhan chu hriat mai a harsa tih sawiin Vety department thawktute chuan, “ASF luhna tak hi chiang taka sawi mai a harsa a. State pawn atanga vawk lakluh atanga inkai darh a nih theih rualin Mizoram chhunga sanghal ah pawh ASF hri vei hmuh anih avangin sanghal atanga inkaichhawn pawh a ni thei tho a ni,” an ti bawk.