Aizawl: AH & Vety department chuan Assam ah vawk natna chi khat African Swine Fever (ASF) a len avangin state dang atanga vawk lakluh a khap.

Africal Swine Fever hi China atanga intan a niin he natna kai vawk te chu an thih zel avangin leh a invenna damdawi a la awm loh avangin a hlauhawm hle niin AH & Vety department thawktu te chuan an sawi a. Tunhnaia he natna ni ngeia rin vawk 800 vel chu Assam ah an thih avangin fimkhur thil ah state dang atanga vawk lakluh hi department chuan a khap ta a ni.

Zalen zawhna chhangin Vety department thawktu te chuan tunhnaia vawk thahnem tak thihna chu hriat ni chiah lo mahse an natna lanchhuah dan atangin ASF hi ni ngeia an ngaih thu an sawi a.

He natna finfiah tur chuan The National Institute of High Security Animal Diseases, Bhopal ah test a ngai a, mahse India ramah lockdown kalpui anih avanga thlawhna leh rel service a awm loh avangin tun dinhmunah chuan eng natna nge finfiah theih a ni hrih lo niin an sawi.

Vawk lakluh khap anih chuan Mizoram in vawksa ah harsatna a tawk thei dawn tih sawiin department thawktu te chuan harsatna chu tlem awm deuh mahse Mizo zingah vawk vulh an tam tawh avangin harsatna hian a awh rei an rin loh thu Zalen an hrilh bawk.

ASF vanga vawk damlo te chu an vun a sen vak a, an kua a tha lo a, an luak bawk thin niin thudawnna chuan a sawi bawk a ni.