ZALEN August 3, 2025: Assam leh Mizoram ramri depa police duty-te chu ramri-ah ngawrh leh zual zawka duty turin hriattir an ni a, hei hi Assam sawrkarin ram dang mi dan loa an state-a awmte a hnawh chhuah mek vang a ni.

Vairengte police station atanga thudawn danin ramria duty police/IR-te chu a hma zawng aia ngawrh leh zual zawka duty turin hriattir an ni a, Vairengte check gate-a duty-te pawh Assam atanga dan loa lut an awm leh awm loh uluk taka enfiah turin hriattir an ni bawk.

Thudawnnain a sawi danin Assam leh Mizoram inrina hmun hrangah ngawrh taka duty kalpui a nih mek lai hian, he thu ziah lai thleng hi chuan India khua leh tui ni lo, Assam sawrkarin a hnawh chhuah Mizoram a lut an awm hriat a la ni lo a, chutiang chi man chhuah pawh an la awm lo.

Hetihlai hian Central YMA chuan thuchhuah siamin Assam sawrkarin ram dang mi dan loa an state-a awmte a hnawh chhuah mek avangin Inner Line Permit (ILP) pekah fimkhur turin sawrkara thuneitute an ngen a, state ramri hnaiha awm YMA-te a tul anga hma la turin an chah bawk.

YMA Central Executive Committee chu Thawhtanni zan khan an thukhawm a, Assam sawrkarin an state chhunga dan loa ram dang mi (Bangladesh atanga lut) awm an hnawh chhuahte Mizorama an luh lohna tura hmalak dan tur an ngaihtuah.

CYMA chuan thuchhuah siamin Assam atanga hnawh chhuahte chu Assam thenawm state-a an luh lohna turin state dangten hma an la mek tih an tar lang a, “Kan state-ah pawh eng emaw zat rawn lut ve thei an nih avangin lo inven dan turah sawrkarin ruahmanna a la siam lo a nih chuan, siam thuai tur leh ILP pek chhuah kawngah fimkhur lehzual turin kan ngen,” an ti.

Mizoram ramri hnaiha awm YMA sub-headquarters, group leh branch-te chu dan loa state dang atanga Mizorama rawn lut tur ven kawngah a tul anga hma la turin CYMA chuan an inhriattir bawk a ni.

Picture : File photo